Shillong, Risaw 03: Ka Sorkar Jylla kala rai ban pynsangeh noh shuwa ia ka jingpdiang ia ki kyrteng kiba la jied ban leit pule ia ka MBBS hapoh ka Central Pool quota.
Kane ka rai kala mih kum ka jubab ia ka jingpyrshah kaba jur da ka seng Khasi Students’ Union (KSU) halor ka jingleh bym hok ha ka rukom jied ia ki samla pule ki ban leit pule na ka bhah ka Jylla.
Ka jingpynbna bala pynmih da u Deputy Secretary ba khmih ia ka Tnad ka Koit ka Khiah, ha ka 2 tarik Risaw ka pynbna ba ka sngi ba pdiang ia ki kyrteng bala pynmih ha ka 30 tarik Nailur, 2025, yn pynsangeh noh shuwa tad haduh da pynbna da kumwei. Hynrei, ka jingjied kyrteng ia kiwei ki course bad MBBS ha Shillong Medical College kin dang iai bteng kumba la pynmih.
Ka KSU kala kynnoh ba ka don ka jingleh bym hok ha ka jingsam ia ka bhah pule.
Haba kren sha ki lad pathai khubor ha ka sngi Thohdieng, u General Secretary ka KSU samla Donald V Thabah ula pyntip ba ka Directorate of Health Services kala leh ia ka jingbakla ha ka reservation policy, da kaba pynduh ia ki samla pule Khasi ia ka jaka ba ki dei ban ioh.
U ong ba arngut ki bar jylla, Diya Ghosh bad Tanushka Chakravarty, kila shah jied ban leit pule MBSS hapoh ka bhah pule ka jylla watla don katto katne ki samla Khasi kila ioh kham bun ki marks. Ka Ghosh kala ioh 472 mark katba ka Chakravarty kala ioh 442 marks. Hynrei, kawei ka samla Khasi kala ioh 475 marks khamheh ban ia ka Ghosh bad palat 7 ngut ki samla Khasi kila ioh kham bun ki marks sha Chakravarty.
Kum kane ka jingleh bakla la lep ruh ha ka thup Bachelor of Ayurvedic Medicine & Surgery (BAMS), ha kaba ki kyrtong bar jylla ba ioh duna marks kila rung ha ka thup waiting list kham hakhmat ban ia ki samla pule khasi ba kham ioh bun marks.
“Ka Sorkar ka dei ban leh eiei bad pynbeit shisyndon ia kane ka kam. Kam dei kaba ngi pyrshah iano iano ruh hynrei ka long kat kum ki kyndon ban jied ia ki kyrtong,” ong u samla Donald haba dawa ban weng noh ia ka thup Scheduled Caste namar ba kam shym la kynthup ha ka State Reservation Policy.
Ha ka sngi Palei, u samla Donald ula kynnohba leh bym hokha ka rukom jied, da kaba ong ba katto katne ki samla pule Khasi kiba bun marks ban ia ki arngut ki samla pule bar jylla, kila shah kyntait.
Une u Nongialam ka KSU ula buh jingkylli ba hato kane ka jingleh bakla ka dei namar ka jingbakla ka Sorkar, ka jingbym ler ha ka rukom treikam hapoh ka Tnad lane ka jingleh ba da thmu ban pynmyntoi ia ka longiing ka Tanushka, lehse namar ba ka don ka jingiadei bad ki Heh Ophisar ka Jylla.
“Wat la ka long kumno kumno ruh, ka KSU ka shim ia kane kum ka jingpyrshang kaba paw pyrthei ban pynduh ia ka hok ki samla pule Khasi bad kum kine ki jingleh ki lah ban pynbor ia ka seng ba kan leh eiei” ula maham.
U samla Donald ula bynrap “Ka KSU ka dawa ia ka Sorkar Jylla ban weng noh ia ka kyrteng jong ka Tanushka Chakravarty na ka thup bad ban ai ia ka seat sha ki samla pule Khasi kiba dei hok ban ioh”.
“Lad aka Sorkar kan leh eiei halor kane, ka KSU kala byrngem ban mih sha surok na ka bynta ban pynbor ia ka Sorkar ba kan ithuh ia ka hok jong ki samla pule Khasi” ula ong.
Kat kum ka jingong jong u, kane kam dei ka sien ba nyngkong ba ka KSU kala pynsngew ia ka jingsngewkhia halor ka jingsam ia ka bhah pule, kum kine ki jingjia kila jia ha u snem 2020 haba sam ia ka bhah pule Agriculture.
