Shillong, Risaw 02 : Ka Federation of Adhoc School Teachers of Meghalaya (FASTOM) kala pynsangeh noh ia ka jingiakhih da kaba shong kyllain mungor ba khlem pud hadien ba ka Sorkar Jylla kala kular ban pyntrei ia ki 4 tylli ki jingdawa ba kongsan kynthup ka basic pay, ka ban treikam naduh ka 1 tarik Iaiong, 2026.
Ia kane ka rai la shim ha ka jingialang jong ka Central Executive Committee (CEC) jong ka Federation ba long ha Shillong bad Tura ha ka sngi Palei, shisngi hadien ba ki nongialam kila iakynduh ia u Myntri Rangbah ka Jylla Conrad K Sangma ha ka Bungalow ba u sah.
“Ka jingialang CEC ba long ha Shillong bad Tura kil mynjur lang ia kaei kaba mih na ka jingilaang bad ka Sorkar bad ngi la mynjur lang ban pynsangeh noh ia ka jingiakhih” ong u Vice President ka FASTOM Bah S Jungai haba iakren bad ki nong thoh khubor.
Ula pyntip ba ka Sorkar kala kular ban pyntreikam ia saw tylli ki mat jingdawa ha ka jingialang. Kine ki kynthup ba ki nonghikai adhoc kin ioh noh ia ka basic pay kaban pynshong nongrim na ka jingtrei slem ha ka kam, ka pay scale kaba iapher ia ki nonghikai kiba la shakri 10,20 bad 30 snem, ki nonghikai kn ioh ia ka dearness allowance ba shisien shisnem bad ka Sorkar kan synniang 8% sha ka CPF, katba ki nonghikai kin synniang8 %, ka ban ai jingmyntoi ynda kila shongthait.
“Ia kine ki saw tylli ki mat yn sa pyntreikam noh da ka Sorkar naduh ka snem mang tyngka ban wan kata naduh ka 1 tarik u Iaiong 2026” ong u Bah Jungai haba bynrap “Ka Sorkar kala pan por lai bnai ba kan pynkhreh ia ka basic pay, DA bad ka CPF bad ia ka rai ba katno ki nonghikai kin ioh, yn sa shim ri da ka Sorkar hashuwa ka Khristmas”.
HAba kylli halor ka jingdawa ban kyntiew kyrdan ia ki skul adhoc sha ki deficit, u Bah Jungai ula ong ba u Myntri Rangbah ula ai jingmut ban klet shuwa ia ka jingkyntiew kyrdan bad pynleit jingmut halor ki lad ki lynti ban weng noh shuwa iaki jingeh ba ki iakynduh.
“Haba ngi iakren ia ka jingkyntiew kyrdan ia ki skul adhoc sha ki deficit, u Myntri Rangbah ula pyntip sha ngi ba lada ngi dei ban kyntiew kyrdan sha ki deficit, ki don ki kyndon ba hap ban bud bad lada dei ban bud ia kine ki kyndon, kiba bun na ki nonghikai kin duh ia ki jingmyntoi na kane ka jingkyntiew kyrdan. Ula bthah ia ngi ba klet noh ia ka jingkyntiew kyrdan, bad ban iakhmih shuwa kumno ban weng ia ki jingeh ki nonghikai” ula bynrap.
 kala pynsangeh noh ia ka jingiakhih da kaba shong kyllain mungor ba khlem pud hadien ba ka Sorkar Jylla kala kular ban pyntrei ia ki 4 tylli ki jingdawa ba kongsan kynthup ka basic pay, ka ban treikam naduh ka 1 tarik Iaiong, 2026.){kind=link}