Shillong, Risaw 02 : Ka United Democratic Party (UDP) kan sa thoh shen sha u Myntri ka Environment, Forest bad Climate Change, ka ban pynpaw ia ka jingpyrshah kaba jur ia ka Office Memorandum (OM) ba pynmih dang shen da ka Ministry.
Haba kren sha ki nongthoh khubor, u General Secretary ka UDP Bah Titosstarwell Chyne ula ong ba ka UDP ka pyrshah ia ka OM ba la pynmih da ka Ministry of Environment, Forest and Climate Change namar ka thmu iuhroit ia ka hok jong ki paidbah ba kin pynpaw ia ki jingsngew jong ki lyngba ki public hearing, khamtam haba iadei bad ka kam tih Uranium.
“Namar kata, ngin sap hah ia ka shithi sha u Myntri ka Ministry of Environment, Forest and Climate Change halor kane ka kam” ula bynrap.
U Bah Titos ula ong ba ki kyndon jong ka OM kan ktah jur bha ia ka koit ka khiah bad ka jinglong jingman jong ki paidbah ha ki jaka ba don ka par uranium, ka ban buh ia ki ha ka jingeh ba kin rep kin riang lane ban shong shnong ha kitei ki jaka.
Ka UDP kala kyntu ia ka Sorkar Jylla ba kan pyrshah ia kane ka OM bad dawa ruh ia ka KHADC ba kan pyndonkamia ka bor ha kaban pynthikna ba ym dei ban ailad ia ka jingtih par khlem da ioh ia ki jingbit napoh ka Council.
