Hiar jurip u DyCM ia ka jingtwa u lum harum Laitlyngkot
Shillong Nailur 28: U Symbud Myntri Rangbah ka jylla Bah Prestone Tynsong ula ong, shen yn sa lum ia ka jingialang ban shim ia ka rai ban phah trei noh 12 -13 kynta ha ka shi sngi ia ka surok Shillong-Dawki, ban pynthikna ba ka kompani kan lah ban pyndep hapoh u Nohprah 2026 ia ka surok.
U Bah Prestone Tynsong ula kren ia kane ha ka sngi Saitjain hadien ka jingjurip ia ka jingtwa u lum harum jong ka shnong Laitlyngkot, kaba la jia ha kine ki ar sngi kiba la dep.
Ha kane ka jingjurip la iadonlang u General Manager ka NHIDCL, ki nongmihkhmat jong ka kompani kaba shna ia ka surok bad kiwei kiwei. La sakhi ba ki kali kila ioh ban iaid biang na katei ka surok hadien ba ka kompani kala dep ban pynkhuid noh ia ka khyndew bad ki maw kiba la tap ia ka surok na ka jingtwa u lum.
“Une u lum ula twa watla kam shim la don kano kano ka jingtih eiei ha ki bynta ba shajrong jong u lum ne ban leh ia kano kano ka Blasting” ong u Bah Prestone haba kyntu ia ki paidbah kiba iaid ba ieng lyngba kane ka jaka ba ki dei ban long kiba husiar bha bad ki dei ban kiar kat kaba lah ban ym iaid ha ka por mynmiet bad kan kham shngain shibun ban iaid ha ka por mynsngi mynshai.
Ula ong, ka jingtwa u lum ha kine ki 2 sngi kiba la dep, kala pynthud ia ka leit ka wan jong ki paidbah bad kala buh ia ki paidbah ha ka jingeh namar ba ki kali kila hap ban iaid noh na Sohra bad kila hap ban lut ia ka bai kali haduh 3 shah.
“Nga kyrpad ia ki paidbah ka thain Riwar bad ki paidbah ka Pynursla ba kin long kiba shah shitom shipor hynrei tang shu la dep shna ia kane ka surok, kan long ka jingmyntoi kaba khraw ia ki paidbah kane ka thain baroh kawei khamtam ka thain Pynursla, Dawki bad kiwei kiwei ki jaka kiba khring ia ki nongjngohkai kiba wan na kylleng ki jaka” ong u Bah Prestone.
U Bah Prestone ula pynthikna ba ia ka jingshna ia ka surok Shillong-Dawki yn pyndep ha u Nohprah 2026 hynrei ban lah ban pynurlong ia kane kumta ka Kompani ka donkam ban ioh kham kylluid ia ka por trei ha ka shi sngi.
“Ia mynta ka kompani ka ioh trei tang 4 kynta ha ka shisngi namar ba ka hap ban plie bad ban shah ia ki kali ba kin iaid na kane surok. Ka sorkar jylla kan sa lum ia ka jingialang bad ki heh ka NHIDCL, PWD, ka kompani bad ki bor pyniaid district ban rai ba naduh u bnai ban wan, yn ailad noh ia ka kompani ba kan trei noh 12-13 kynta ha ka shi sngi da kaba trei naduh ka por mynstep haduh ka por mynmiet khnang ba kan ioh ban pynleit jingmut thikna ha kaban shna ia ka surok khlem kano kano ka jingthud bad ban pyndep ha ka por kaba la buh” ula ong.
U Symbud Myntri Rangbah ula kyrpad ia ki paidbah ba ia mynta kin mad jingeh ha ka leit ka wan ka jongki hynrei tang shu lah dep shna ia ka surok, kane ka surok kan long ka jingmyntoi kaba khraw ia ki paidbah ka thain bad kan kyntiew ruh ia ka kam jngohkai ha ka thain baroh kawei.
