Nongstoiñ, Nailur 25: Haduh 6 ngut ki briew kila iap na ka jingpang rabies ba ioh na ka jingshah dait ksew ha West Khasi Hills ha kane ka shisnem tam kata naduh u snem 2024.
Ia kane la pyntip da ki borkhmih ka Ophis u District Medical & Health Officer (DMHO) ka West Khasi Hills haka jingrakhe ia ka Workd Rabies Day, kaba la pynlong ha ryngkat bad ka District Animal Husbandry & Veterinary, ha ka sngi Palei ha St. Peter’s Higher Secondary School, Pyndengrei.
La pynsdang ia kane ka prokram da ka jingiakop thoh dur, poster bad elocution hapdeng ki khynnah skul.
Haba ai jingkren ka Dr L Mylliemumlong, Ophisar ka District Animal Husbandry & Veterinary kala pyntip ba ka jingpang rabies ka dei ka jingpang kaba lah ban iada haba pynshai pat ba ka long kaba donkam ban leit sumar da kaba ai injek ha ka pork aba biang ban nym buh ialade ha ki jingma.
U kongsan Bah CP Mawkon, Additional Deputy Commissioner ka West Khasi Hills, ula pyllait paidbah ia ka video bala thep ha Youtube kaba ai jingtip shaphang ka jingpang rabies.
Haba ai jingkren, ula ong “Ka jingshah dait ha ki mrad la ka dei ha ki ksew, miaw bad kiwei kiwei ki mrad, kam dei ka kam kaba lah ban khein sting, namar kham bunsien kane ka jingpang lada ym sumar ka lam beit sha ka jingïap. Ka jingïada kham kloi bad ka jingai injek, ka lah ban iada ïa ka jingim”.
U la kyntu ruh ïa ki khynnah skul ba kin shim ka bynta ba kongsan eh ban pynsaphriang ïa ka jingtip bad ka khubor kaba shai sha baroh, khnang ba kane ka jingmyntoi bad jingtip kaba ki ïoh na kane ka prokram kan pur sha ki longïing longsem bad sha ka imlang sahlang.
La pynkut ïa kane ka prokram da ka jingai khublei bad jingai khusnam sha ki nongjop ha ki jingïakop thoh Dur (Drawing Competition), kata sha ka St. Francis D. Assistant Higher Secondary School, Poster Competition sha ka Sibsingh Memorial Higher Secondary School bad Elocution sha ka St. Peter’s Higher Secondary School.
