Shillong, Nailur 24: U MLA ka Sohra constituency u Bah Gavin M Mylliem ula plie ia ka Special Health Camp hapoh ka Swasth Nari, Sashakt ParivarAbhiyaan (SNSPA) ha Swer Primary Health Centre, East Khasi Hills District.
Ia ka Special Health Camp oa pynlong da ka District Health Society, National Health Mission (NHM), East Khasi Hills, Shillong ha ryngkat ka jingiatreilang bad ka BPMU-NHM bad ka Swer PHC.
Ka thong jong ka Special Health Camp kadei ban pynkhlain ia ka jingshakri ha ka koit ka khiah, ban pynbha ia ka jingsngewthuh shaphang ka koit ka khiah jong ki kynthei bad ki khynnah bad ban pynthikna ban ioh ia ki jingshakri ba kyrpang ha ki shnong ki thaw.
Haba kren ha kane ka sngi u Bah Gavin u la ïaroh ïa ka jingtrei shitom jong ka District Health Society bad ki seng ba ïatreilang ban wanrah ïa ki jingshakri ba kyrpang ha ka koit ka khiah kham jan sha ki paidbah haki thain nongkyndong.
U Bah Gavin la ong ba ka koit ka khiah kadei ka ba donkam tam ha ka imlang sahlang bad u la ai ka jingiaroh iaki tnat treikam ban pynthikna ba ki jingshakri kiba bha kin poi sha ki paidbah, khamtam eh sha ki kynthei bad ki khynnah.
U la kyntu ia ki paidbah ba kin iashim bynta shitrhem ha kum kine ki jingthmu bad ban pyndonkam pura ia ki lad ki lynti ba la ai daki tnat ban ioh ka jingsumar ba paka.
Ka Special Health Camp ka kynthup ïa ki jingïalang pynsngewthuh shaphang ka koit ka khiah bad ka rukom bam, ki jingpeit bniah da ki doktor ba kyrpang, ki jingai jingmut na ka bynta ki kynthei bad ki khynnah kynthei kiba dang samla, ka jingïarap ban ai snam, ki jingpyni ïa ki mar bam ba tei met da ki Self-Help Group bad ka ICDS, ki jingïakop kylli jingkylli na ka bynta ki khynnah skul, ki jingïakop pyni nam iala khunlung, bad ka jingpynrung kyrteng ïa ki nongïoh jingmyntoi hapoh ka MHAAB.
Ha kane ka sngi la sakhi ka jingwan shim bynta daki paidbah ban ioh iaki lad jingsumar naki Doctor ba tbit.
Ka jingnoh synniang kaba kyrpang la ai da ka Nazareth Hospital, Shillong, kaba la phah ia ki doktor ba kyrpang na ka bynta ka Special Health Camp ban ai jingmyntoi iaki paidbah ka thain.
Na ka liang ka District Health Society ka la pynpaw ka jingsngewnguh ia ka Nazareth Hospital kaba la ai ka jingiatreilang bad ka jingkyrshan ha ka ban pynlong ia kane ka prokram kaba jop.
Ha kane ka prokram la wan ban ïashim bynta da Dr. E. Kharmutee, District Medical and Health Officer, W. Kharbuli, Block Development Officer ka Laitkroh 12 Shnong, Dr. K. Kharnaior, Senior Specialist ka Sohra CHC, Dr. R. Kyndiah, Senior Medical Officer bad Block Medical Officer nalor ki ophisar naka tnat ka koit ka khiah,nICDS, MSRLS, ka tnat Pule Puthi, ki Self-Help Groups, ki ASHAs bad ki dkhot Village Health Committee.
Ka Swasth Nari, Sashakt Parivar Abhiyaan hapoh ka National Health Mission ka dei ka jingthmu ba kongsan kaba pynleit jingmut ha ka jingai jingsumar ba pura na ka bynta ki kynthei, ki khynnah bad ki longïing.
Ka thong jong ka Campaign ka long ban pyndap ïa ki jingduna ha ka jingïoh ïa ka jingsumar bad ban pynthikna ba ïa ki jingshakri kiba bha la wanrah kham jan sha ki paidbah.
 ha Swer Primary Health Centre, East Khasi Hills District){kind=link}