Shillong, Nailur 22 : U Myntri ka Tnad Pule Puthi Lahkmen Rymbui ula ai ka jingkular ba ka Sorkar Jylla kan sa shim ia ka rai halor ka jingdawa ban kyntiew kyrdan ia ki skul adhoc sha ki deficit, kaban pynshong nongrim kat kum ka jingdon pisa ka Sorkar.
Kane ka jingkren kala mih hapdeng ka jingiakhih jong ka Federation of All School Teachers of Meghalaya (FASTOM), kaba dawa ban kyntiew kyrdan noh ia ki skul adhoc sha ki skul deficit.
Haba iakren bad ki nongthoh khubor ha ka sngi Nyngkong, u Bah Rymbui ula ban jur ba ka Sorkar kan sa shim ia ka rai kat kum ka jingdon pisa, haba kdew ia ka jyrwit jyrwat jong kane ka kam bad ka jingdonkam ban hap da bishar bniah bha.
“Kane kam dei shuh ka kam thymmai. Kane ka dei ka kam kaba la sahteng la slem bha hynrei haba ong kumta, kam dei kaba suk ia ka Sorkar ban leh namar ka donkam ia bun bah ka pisa” ula ong.
Ula pynpaw ba ka Sorkar kala dep pynkiew ia ka tulop ki nonghikai ha u snem 2021-22 bad kular “ Ngi dang bishar bad ngin sa peit ia ka jingdon pisa ka Sorkar bad ngin sa peit ia kaei kaba ngi lah ban leh”.
U Myntri ula pyntip ruh ba u Commissioer & Secretary ula iakynduh ia baroh ki seng nonghikai bad ka Sorkar kan sa leh kat kaba lah ban pynbeit ia ki jingeh jong ki.
“Hynrei ia mynta ngam lah ban ong eiei. Nga hap ban peit shuwa namar ka Sorkar la ka dei mynta lane mynnin, kane ka dei ka kam kaba iai bteng bad ngi hap ban peit ia kaei kaba ngi lah ban leh na ka bynta ki kynhun bapher bapher”.
Haba kyntait ban kynthoh palat ia kane, u Myntri ula ong “Kam long kaba suk ia ka Sorkar ne ia ka Tnad ba kan leh eiei hynrei ngi don hangne ban shakri ia ki paidbah bad ngin pyrshang ban shakri kat kaba ngi lah, ngin pyrshang ban peit ia ka bha ka miat jong baroh”.
Ka FASTOM kala pynbna ba kan pynbteng ia ka jingiashong kyllain myngor tad haduh ba ka Sorkar ka kloi ban wanrah da ka Policy ka ban pynkut noh ia ka adhoc system hapoh ka Jylla.
