Jowai, Nailur 19 : Ka jingiakynad hapdeng ki Karbi bad ki Khasi-Pnar ha shnong Lapangap kala khie biang ha ka sngi Thohdieng hadien ba ki paid Karbi, kila pynthut ia ki nongrep ka shnong Lapangap da kaba siat da ki jri katba ki dang ia leit otkba sha lyngkha.
Kane ka jingjia kala jia ha ka por 12 baje mynsngi bad la iathuh ba ki paid Karbi kila siat ruh da ki jri wat ia ki Pulit ka Jylla Meghalaya kiba la hiar wut wut sha katei ka jaka ban iada ia ki nongrep ka Lapangap.
Kat kum ka khubor, kumba 30 ngut ki nongrep na Lapangap kila leit sha la ki jong ki lyngkha ha ka por 10 baje mynstep ban ia ot kba hynrei kynsan kynsan ki Karbi na ka shnong ba marjan ka West Karbi Anglong, kila pynthut ia kine ki nongrep bad hadien kila siat sa da ki jri siat sim.
Haba ioh jingtip ia kane, ki nongialam shnong ka Lapangap kila pyntip mar mar sha ki Pulit ka Meghalaya kiba don hapoh ka Shnong. Ki Pulit ruh mar mar kila hiar sha katei ka jaka hynrei la pdiang sngewbha ia ki da ki paid Karbi kiba la nang ia lum paid, kiba la pyndonkam da ki jri siat sim ban siat naphang ia ki nongep bad ki Pulit ruh kumjuh.
Hadien kane, kki Pulit ka Meghalaya na Lapangap, kila pyntip mar mar ia kaei kaba jia sha ki Pulit ka Assam, kiba la wan ban beh krad noh ia ki Karbi na katei ka jaka.
Ki Pulit ka Meghalaya bad ka Dorbar Shnong Lapangap, kila kyntu ia ki Pulit ka Assam ba kin iarap lem ha ka jingpahara ban pynthikna ba ki nongrep kin ioh leit ot suk ia u kba khlem kano kano ka jingpynthut hynrei la kynnoh ba ki Pulit ka Assam kila kyntait.
Namar kane, ka Dorbar Shnong kala kyntu ia ka Sorkar Jylla ba kan pynbun noh ia ka jingdon ki Pulit hapoh Lapangap bad ban aibor ia ki ba kin iada ia ki nongrep jong ka Shnong ba kin leit kba ha kine ki sngi bad taiew ban dang wan.
