Shillong Nailur 12: Namar ka jingtorti jong ka tnad MeECL, sa shisien biang kala paw pen ryngkew, haba uwei u briew u bym lah ban ithuh ula duh iala ka jingim da kaba leit rung ha ka jaka kaba don u Transformer ia kaba ym shim la khang tala uba don ha ka ophis jong ka PHE,Tura.
Une u briew uba la la khlad noh na ka jingshah bat haka bording elektrik, la suba ba u dei u nongtam tiar jot bad u la iap ha ka sngi Saitjain ne sngi u Blei bad la lap ia u ha ka lah sngi u Blei, haka por ba ki Linesman jongka MeECL ki dang leit jurip ia u Power Line uba ialam sha ka jaka kaba don u Transformer uba don hapoh jong ka ophis treikam jong u Additional Chief Engineer ka PHE ha Araimile Market,Tura.
Ha ka por ba lap ia katei ka metiap la shem ba kala pyut kaba pynpaw ia ki dak ki shin ba katei ka jingjia kala jia ha ka por ba ki ophis treikam kila khang bad don hapdeng ka jingioh shuti.
Watla utei u Transformer u don shadien jong katei ka ophis treikam hynrei ka jingkylli kaba mih ka long balei ym shim la khang tala ia katei ka jaka.
Ka rilum Garo kala mad ia kiba bun ki jingjia ha kaba ki briew kila duh iala ka jingim na ka jingshah bat haka bording elektrik namar ka jingtorti jong ki ophisar bad ki nongtrei jong ka MeECL bad man la ka por ki paidbha ka thain ki la ud la nam iaka jingtrei torti kaba la buh kylla iaka jingim briew ha ka jingma bakhraw.
Ka lah ban don ka jinglait jong ka ding na u Transformer ia kaba ym pat lah ban tip satia namar ia ka met jong utei u briew la shem ba u la thiah lyngktar ha madan.
Ka jinglait jong ka bording elektrik kam dei shuh kaba thymmai ha ka tnad MeECL ha kaba bunsien la kynnoh ba kadei namar ka jingtrei torti ki nongtrei.
Ar snem mynshwa, ka Sub-Station kaba don ha Hawakhana, Tura, la shem ba kala don ka jinglait jong ka bording elektrik bad kala par lyngba ki pipe um kiba poi sha ki iingbriew kiba sah ym jngai than na katei ka Sub-Station. Ki briew kiba don ha kitei ki iing kila shah bat haka bording kaba iaid lyngba ki pipe um bad kila khlad.
Kaba lyngngoh ka long baka MeECL kam shym la lah ban lap ia katei ka jinglait jong ka bording elektrik bad kala shu pyndait da ki ‘Earthing’ ban kiar iaka jingpoi ka bording sha ki iing ki sem.
Ka jingpyniaid ia ki sainar elektrik na kawei ka jaka sha kawei pat kiba noh rynjaw hajan ka St. Anthony’s High School hajan Jengjal’s Baljek Airport kala buh ha ka jingma kaba khraw ia ka jingim briew.
Da ki spah ngut ki khynnah pule ki iaid na katei ka surok kaba don ka jingnoh jong ki sainar elektrik kiba shyrkhei.
“Ngi la iohi ia katei la slem hynrei ym shim la don mano mano ruh naka MeECL ban wan jurip satia. Kino kino kiba shong halor jongka Bus ki lah ban shah bat haka bording elektrik” la pynpaw ki nongshong shnong kiba pyndonkam ia katei ka surok.
