Shillong, Nailur 12 : U Myntri Rangbah ka Jylla Conrad K Sangma ha ka sngi Thohdieng, ula kular ba ka Sorkar Jylla kam don jingthmu ban shimti pyniaid hi noh ia baroh ki skul deficit lane pynsangeh noh ia ka grant-in-aid ba ki ju ioh kum ka jingkyrshan.
Kat kum ka jingong jong u, ka Meghalaya Education Grant (MEG) bala tyrwa, ka dang don ha ka jingiakren bad ka Sorkar ka kloi ban pdiang ia ki jingai jingmut bad ban pynbeit ia ka rukom treikam ba kan kham treikam bha.
“Ka jingthmu jong ka Sorkar kam dei ban pynthut iano iano ruh. Ngi kwah ba kan iaid kumba ju iaid hynrei ki skul bapher bapher bda ki jingdawa bapher bapher ki dang iai wan sha ngi. Kumta, ka long kaba eh ia ngi ban wanrah ia kawei ka lynti ban pynbeit ka ban iahap ia baroh. Don ki skul kiba kwah provincializebad don ki skul kiba kwah ban pynbteng ka deficit system. Ngi la kren shai ha baroh ki kam ba ngi ngeit ha ka jingiakren, jingia syllok bad kane ka dei kaba ngi leh mynta” ong u Conrad haba jubab ia ka jingkylli bynrap na u MLA ka Nongkrem halor ka nongrim jong ka Sorkar ba iadei bad ki skul deficit.
“Ngim don jingmut ban leh da kaba bor, ym don jingmut ban shimti ia baroh ki skul lane pynsangeh ia ka deficit pattern. Hynrei naba ka jingdawa ka wan sha nga, ka dei ka kamram jong ka Sorkar ban bishar bad wad ia ki lad ki ynti bad halor kane, ka jingiakren kala mih (halor ka MEG)” ula ong haba pynkut noh ia ka jingia sngewthuh bakla bad ban jur ia ka jingdonkam ban pynbeit ryntih ia ka kam pule dangle khnang ban don duna noh ki jait pa ki jait ki skul.
“Ka MEG kam dei satia kaba ngi la pyntreikam, ngi la thaw ia ki kyndon bad ngi dang iakren bad ka jingkylli kam mih ban pynbor iano iano ruh..Ngi dang iakren bad dang shim ia ki jingai jingmut na ki skul” bynrap u Conrad.
Halor ki jingpyrshang ka Sorkar ban pynbha ia ki jingtei ha ki skul Sorkar bad college, u Myntri Rangbah ula iathuh ba ki don palat 2500 tylli ki skul kiba la sniew bha bad kumba T.1000 klur lah dep ban pynlut haduh mynta, bad tang 500 tylli ki skul kila sah ban pyndep noh.
Ula pynbna ba ka Sorkar ka don jingthmu ruh ban ai ka jingkyrshan ia ki skul ba ioh jingiarap na ka Sorkar kynthup ki deficit bad ad-hoc, ba kin shna pynbha ia ki iingskul.
Halor ki jingdawa ban kyntiew ia ki grant, u Myntri Rangbah ula pynpaw ruh ba ka jingkyntiew ia ka ad-hoc bad deficit grant kan don jingktah kaba jur bha ia ka pla tyngka, kaba ka jingdonkam pisa kan long sa kumba T.200-300 klur. Ka Sorkar ka tip bha ia ka jingdawa hynrei kan hap peit shuwa ia ki jingktah ia ka pla tyngka hashuwa ba kan shim ia ka rai.
“Ia mynta, kat kum ka jingkhein ba malu mala, ka Sorkar Meghalaya kala pynlut jan T.600 klur na ka bynta ka tulop sha ki skul Sorkar kynthup ki Lower Primary, Upper Primary, Secondary, Higher Secondary badki College. Hynrei, ka Sorkar kala pynlut palat T.1100 klur ban pyllait ia ki grant in aid sha ki jaka pule shimet ba ioh jingiarap n aka Sorkar ba kynthup ia ki skul SSA, Deficit bad Adhoc manla u snem. Ngi iohi ia ka jingktah ia ka pla tyngka bad ban kyntiew biang ia ki grant kan donkam sa T.200-300 klur. Kumta ka dei ka rai kaba heh ba ngin hap ban shim hashuwa ba ngim jam shakhmat” ula ong.
Halor ka kam khate ia ka tulop ki nonghikai, u Myntri Rangbah ula kular ba ka Tnad Education ka dang khmih ban pynbeit noh ia kane ka kam.
Hashuwa kane, haba ai jubab, u Myntri ka tnad Pule Puthi Rakkam A Sangma ula pynthikna ba ka Sorkar kan sa sangeh noh ia ka jingiarap siew tulop sha ki skul deficit haba pyntip ba don katto katne ki skul bad college kiba la kyrpad ia ka jingtreikam kaba laitluid katba don pat kiba dawa ban shimti pyniaid noh ka Sorkar.
“Ka Sorkar ka dang bishar ia baroh artylli ki jingdawa” ula bynrap.
Kat kum ka jingong jong u, ki don haduh 3361 tylli ki skul Lower Primary, 881 ki skul Upper Primary, 2363 ki Secondary bad 186 ki Higher Secondary kiba hap hapoh ka deficit system.
U iathuh ba ka Sorkar ka kyrshan ia ka jingsiew tulop jong kine ki skul katba ki bor pyniaid skul pat ne School Management Committee (SMC) ki bahkhlieh ia kiwei kiwei ki jinglut.
