Pulom ka Sorkar ban rah ia ki ktem CRPF na Shillong sha NST ba pyrshah ki Dorbar Shnong 

Shillong, Nailur 12 : Ka jingthmu jong ka Sorkar Jylla ban pynkynriah ia ki ktem Central Reserve Police Force (CRPF) na ki saw tylli ki jaka kynthup na Mawlai, sha kawei ka jaka ha New Shillong Township kala iatakhuh mawsiang namar ka jingpyrshah kaba jur na ki Dorbar Shnong ka thain.

“Ha u snem 2022, ngi la dep rai ban rah ia ki ktem ba shipor na ki saw tylli ki jaka ba ngi buh ia ki CRPF sha kawei pat ka jaka ba buh kyrpang. Ha u Jymmang 2022, ngi la buh ia 10 acre ka jaka ha New Shillong Township hynrei shuwa ban iasoi ia ka MoU, katto katne ki shong ka thain kila pynpaw ia ka jingpyrshah ban buh ia ka ktem CRPF” pyntip u Symbud Myntri Rangbah ka tnad kam Pohiing (Police) Bah Prestone Tynsong ha ka jubab ia ka jingkylli bala wanrah da u MLA ka VPP na Mawlai ha Iingdorbar hynne ka sngi Thohdieng.

U Bah Prestone u kular ba un sa iakren ia kane ka kam bad ki Khlieh Synshar Shnong bad ki Dorbar Shnong naba ia kane ka jaka la mang ban buh ia ka ktem ki CRPF ha Shillong.

Ka jaka na ka bynta ka ktem CRPF kan iai neh bad ka Sorkar bad la kyntu ia u MLA ka Mawryngkneng ba un iarap pynsngewthuh lang ia ki paidbah halor ka kamram jong ki CRPF.

Ula pynshai ba ki CRPF ki iapher na kiwei pat ki bor pahara ka Sorkar Pdeng bad la pyndonkam ia ki tang ha ki por ba donkam. Ula ban jur ba ki CRPF kim da iapher than bad ki battalion lajong, ba lah ban pyndonkam ha kino kino ki jingeh na ka sngi sha ka sngi.

U Bah Prestone u pyntip ba ka jingdon ki CRPF ha Shillong bad Tura ka long hapoh 400 ngut bad la pyniaid pura ia ki da ka Sorkar Jylla.

Ula kyntu ruh ia ki dkhot ba ki pynsngewthuh ia ki paidbah hala ki jong ki constituency halor ki CRPF, ban weng noh ia ka jingsngewthuh bakla ba ki long kum ki BSF lane ki Assam Rifles.

U Symbud Myntri Rangbah ula pynbna ruh ba ka Sorkar ka long kaba kloi ban ai 50 acre ka jaka sha ka Tnad Meghalaya Police ban shna iaka Meghalaya Security Complex.

Shuwa kane, haba wanrah ia kane ka mat, u MLA ka Mawlai ula ong ba ka ktem ki CRPF ha Mawlai ka dei kaba la pynmih huri hura bha bad ki paidbah kila dawa ban pynkynriah noh ia ka naduh u snem 2021.