Dawa ka NPP ban pynduh noh ia ka Freedom of Religion Act ka Arunachal Pradesh

Shillong, Nailur 03 : Ka National People’s Party (NPP) kala mynjur ia ka Resolution ba dawa ban pynduh pyndam noh ia ka Arunchal Pradesh Freedom of Religion Act (FRA), 1978.

Ia kane ka resolution ban pynduh pyndam ia kane ka Act la wanrah da u Executive Member jong ka National Committee (NC) , Washi Yalem, kaba la kyrshan da u National General Secretary (Organisation) Paknga Bage ha ka jingialang jong ka National Committee bad ka Annual General Meeting (AGM) ba long ha Tura ha ka 2 tarik Nailur.

Ha kane ka jingialang la wan iashimbynta da ki dkhot na ki Jylla bapher bapher kynthup ia ki dkhot ka National Committee, kiba la niew ia kane ka Act kum ka jingpynkhein ia ki hok tynrai jong ki nongshongshnong ka Ri India.

Haba iashimbynta ha ka jingiakren ia ka resolution, ki dkhot ka NC kila pynpaw ba ka jingpyntrei ia kane ka Act kan wanrah ia ka huri hura hapoh ka Jylla Arunachal Pradesh. Ki dkhot kila kynthoh b aka Act ka dei ka jingpynkhein iaki kyndon ka Riti Synshar ka Ri.

U National Working President, James K Sangma ula ong ba ia kane ka Act dei ban pynduh pyndam namar ka jinglong ain iakjakor.

Ula ong ba ka Article 25 jong ka Riti Synshar kala pynthikna ia ka jinglaitluid ha ka jingsngew bad ka jingpyntreikam ia ka FRA kan lam sha ka jingpyndonkam bakla ia ki ain kiba la don lypa.

Ka NPP kala rai ban sa pynkhreh ia ki kot ki slab a donkam ban phah tuklar lem ha ka Sorkar Arunachal Pradesh ba kan pynduh pyndam ia kane ka Act.

Ka Party kan sa kren ruh ia ka New Delhi ba kan tuklar lem ha kaban khanglad ia ka jingpyntreikam ia kane ka Act ha jylla Arunachal Pradesh.

Ka Arunachal Pradesh Freedom of Religion Act, 1978, ka dei ka ain kaba khanglad ban pynkylla ia ka jingngeit niam na kawei ka niam sha kawei pat da kaba shu pynbor, pynbiej, len ki kam shukor. La pynlong ain ia ka ban iada ia ka kolshor ki trai ri trai muluk bad ka jingleh niam jong ka Jylla hynrei kane ka ain kala shu sop puipui da ki phew snem namar ka jingbym don ki rule bad ka jingpynbor na ki kynhun Khristan.