Phah tuklar ka MIMSTF ba dawa ka KHNAM ban ithuh ST tang ia ki Khasi, Jaintia bad Garo

Shillong, Nailur 03 : Ka Meghalaya Indigenous Minority Scheduled Tribe Forum (MIMSTF) kala phah tuklar ha u Chief Secretary bad State Vigilance Commisssioner ka Jylla Bah DP Wahlang halor ka jingdawa ba dang shen jong u Working President ka Khun Hynniewtrep National Awakening Movement (KHNAM) Bah Thomas Passah ba ka bhah Scheduled Tribe (ST) ha Meghalaya ka dei ban leit beit thik tang sha ki jaidbynriew Khasi, Jaintia bad Garo.

“Ngi pynrem jur bad ngi niew kum ka jingleh ba wanrah ia ka jingsngewpher bad jingibein pyrshah ia kiwei pat ki ST ba la ithuh ha Meghalaya kum ki Rabha, Hajong, Koch, Boro, Mann bad ki Karbi ka Meghalaya” ong ka MIMSTF ha ka dorkhas bala aiti sha u Chief Secretary ha ka sngi Balang.

Haba kdew sha ka jingpynrung kam kyrpang ki shipai BSF ha Meghalaya, ka Forum ka ong ba dei ba kynmaw ba ka constitution (Scheduled Tribes) order, 1950, the constitution (Scheduled Tribes) (Union Territories) Order, 1951 [As amended by the scheduled Castes and Tribes Lists (Modification Order) 1956, the Bombay Reorganisation Act. 1960, the Punjab Reorganisation Act, 1966, the Himachal Pradesh Act. 1970, the North-Eastern Areas (Reorganisation) Act. 1971, the Scheduled Castes and Scheduled tribes Orders (Amendment) Act. 1976 and the Schedule Castes and Scheduled tribes Orders (Amendment) Act. 2002) kila ai jingithuh bad kynthup ia ki Rabha, Hajong, Koch, Boro, Mann bad Karbi ha ka thup Scheduled Tribes nalor kine ki lai jaidbynriew riewlum ba hehpaid ha Meghalaya bad ia ka hok bad ka jingithuh kyrpang jong ki la iada da ka ain.

“Kumta, kum kine ki jingkynthoh da u Working President jong ka seng sain pyrthei ka Meghalaya ka dei kaba ma bha ia ka jingia im lang jong kiba bun ki jaidbynriew hapdeng ka jingsuk jingsain ha Meghalaya. Ki seng sain pyrthei bad ki nong ialam kimdei ban pynsaphriang ia ki kyntien ba pyniapait iapra hapdeng kino kino ki riewlum” kala ong.