Shillong, Nailur 01 : U Myntri ka Tnad Labour Bah Shakliar Warjri ha ka sngi Nyngkong, ula pyntip ia ka jingpaw pyrthei ka kam ai Labour Licence thok ia ki nongtrei bylla bar jylla ha Meghalaya, kaba pynmih ia ka jingsngewkhia kaba jur halor ki jingbym biang ha ka jingpyrrkhing ia ki nongbylla.
U Myntri ula pyntip ba ia kane ka kam shukor la lap ha ka jingbishar ia ki kam ki jam jong ka Tnad, ha kaba la shem ba ki kot ki sla bala lum na ki katto katne ki nongtrei ki dei kiba khlem ai satia da ka Tnad Labour ka Jylla.
“Kane ka kam ka dei kaba leh da mano re mano ia kaba ngam tip satia bad kila leh ia kaei kaei kaba bakla palat…kumta nga la rai bad ngi kum ka Tnad ngin sa ujor da ka ejahar bad ki briew kiba donkti kin ioh ia ka jingpynsajia” ula ong.
Ula ong ba kane ka jingshem ka dei kaba bakla palat bad kren shai ba ki briew ba donkti kin ngat kat kum ki kyndon ain. Ula ban jur ruh ba ka Jylla kamm lah ban shu sngap ia kane da kaba ailad ia kum kine ki kam thok kam shukor.
Hapdeng ki kaiphod ba ki Sengbhalang kila nang pynkhlain ban khynra Labour Licence, u Bah Warjri ula ong ba ka Tnad kala sdang ia ka jingkhynra ha kylleng ki District. Ula pynbna ba ki jingtalasi ia ki kot ki sla kan long noh ka kam ba leh man la ka por, bad kaba un shong shong bishar manla ka lai bnai.
“Ngin ym ailad satia ia kum kine ki kam namar ngin ym iapein ia ka jingshngain jong ka Jylla jong ngi” ula pynthikna.
Kane ka jingsei madan kala jia ruh ha ka por ba ka jingkhynra mynder kala jur bha ha Jylla khamtam da ki Sengbhalang kiba la pynlong ia k jingkhynra manla ka sngi namar ka jingkyndang jong ka Sorkar Assam ia ki poi ei na ri Bangladesh.
