Shillong, Nailur 01: Ka jingia hylla slogan mar pyrshah hapdeng ki dkhot ka BJP bad ka Congress kala thnem bha ha nongbah Shillong hadien ba ki dkhot ka BJP ki la leitban pynlong ïa ka jingïakhih hakhmat ka Congress Bhavan.
Kane ka jingiakhih bala pynlong daka Meghalaya BJP ka la mih na ka jingkren pynjah burom da uwei u dkhot ka Congress napoh ka Jylla Bihar pyrshah ia ka kmie kaba la khlad jong u Myntri Rangbahduh ka ri u Narendra Modi.
Hynrei ka Congress ka la kyntait ia kane ka jingkam jong ka BJP da kaba kynnoh ba kane ka jingiakhih ka dei ka buit sain pyrthei ban pynklet iaki paidbah ka ri halor ka ka mat tuh vote daka ba BJP.
Haba kren shaki lad pathai khubor u president ka BJP Yuva Morcha, u Bah Mewaker Lyngdoh u la pynksan ia katei ka jingïakhih hakhmat ka ophis treikam ka Meghalaya Congress, da kaba ong ba ka dei ban pyrshah ia ka jingkren bein ia ka kmie jong u Myntri Rangbahduh, da u nongtrei jong ka seng Congress, u Mohammed Rizvi, uba la shah kem noh haki Pulit.
U Bah Wewaker ula ai khublei ruh iaki pulit kiba la shimkhia bad kem noh ïa u Rizvi.
Ula pynbna ba ka BJP kan nym pynlong tang ia ka jingiakhih hakhmat ophis ka Congress hynrei ka thmu ruh ban pynlong da ka jingiakhih hakhmat ophis jong ka Trinamool Congress (TMC), namar ba ki ngeit ba haduh mynta ym pat leh eiei pyrshah ia ka MP ka TMC ka Mahua Moitra halor ka jingkynnoh ba ka la kren pynjah burom ïa u Amit Shah.
Ka Meghalaya BJP ka la ujor da ka zero FIR hakhmat u SP jong ka East Khasi Hills ban dawa ban leh eiei pyrshah ia u Moitra.
U la pynpaw ba kum u nongmihkhmat ym lah ban kren khlem jingkitkhlieh kiba wanrah ïa ka jingïapher hapdeng ki briew.
Katkum ka jingong jong u, ka BJP ka ieng na ka bynta ka roi ka par, ka jingsuk, bad ka jingiatylli hapoh ka ri baroh kawei.
Haba pynrem ia ka jingïakhih ka Meghalaya BJP hakhmat ka ophis Congress, u Secretary ka MPCC u Bah Manuel Badwar u la batai ba kane ka jingiakhih kadei tang ka buit pynklet iaki paidbah naki mat buihtuh baka BJP hi ka donkti.
“Ka dei ka jingleh buihtuh na ka liang jong ki kaba nga ngeit ba ki kwah burom bad pynklet iaki paidbah naka mat tuh vote daka party namar mynta ka kynti baroh kawei ka ri ka kren shaphang jingtuh vote” la ong u Bah Maule.
U Bah Manuel ula pynpaw ba kala don ka jingleh tuh haki 70 tylli ki Seat bad ka BJP ka pyrshang ban knieh jubor noh ia ka rukom synshar paidbah.
U la ban jur ba ki jingeh ba shisha kiba ka ri ka iakynduh ki long ka jingkyrduh kam bad ka jingbym ia ryngkat ka jingsam ia ka spah bad kane ka jingïakhih kadei tang ka buit jong ka BJP ban pynklet iaki paidbah.
U Bah Manuel ula kynnoh ba ka BJP, ka don bynta haka sain pyrthei da kaba pynshong nongrim ha ka niam, ka jaitbynriew, bad ka longïing longsem, bad ka kwah tang ban pynthoh bria iaka longïing longsem jong u Gandhi, kaba la kit ïa ka jingeh jong ka jingshah kynthoh, la slem bah.
Haba ïadei bad ka jingïalang jong ka BJP kaba la long dang shen ha Shillong, u Bah Manuel u la kynnoh ba ka jingïakhih jong ka BJP ka dei kaba la kynshoit da ki nongïalam bad ka dei ka jingpyrshang ban pynsngewbha ïa ki heh jong ka party jong ki ym ka jingsngewkhia kaba shisha.
U la ban biang ba ka Congress kan iai bteng ban ieng na ka bynta kiba duk tam na kiba duk bad kan nym shah pynngop ha ki buit jong ka BJP.
U Bah Manuel u la pynpaw ka jingkyrmen ba ki paidbah ki tip ia ki jingleh jong ka BJP bad kin kyntait ia ka politik pynpra jong ki.
“Ka jingkhih ha ka ri baroh kawei ka nang iaid sha kata. Nga ngeit ba 140 klur ngut ki briew ki la sdang ban sngewthuh mynta ba ka BJP kam shym la leh ei ei bad ka BJP ka la thaw ia ka spah tang na ka bynta ki katto katne ngut ki briew bad ka ri ka la nang duk katba lah ha ka ioh ka kot” la ong u Badwar da kaba bynrap “Ka Meghalaya ka dei kawei na kita ki jylla kaba pyrshah. Ngi la pynrem jur bad ngim kwah ba kata kan jia biang.
