Guwahati, Nailar 29: Ki jaitbynriew kiba shong basah ha khappud ka jylla Assam bad Meghalaya kila pynsngew ba lada kam don ka jingiatreilang hapdeng jong ki arjylla, ka jingia tyngkhuh hapdeng ki Hati bad ki briew kan ym lah ban lait satia lano lano ruh.
Ki nongshong shnong na baroh arliang ki la ban jur ba ki hati ki iaid laitluid ha kylleng ka Assam bad Meghalaya, bad dei ban pyrshang ban iada ia ki.
Kila kyrpad ia baroh ar tylli ki Forest Departments jong baroh ar tylli ki jylla ba kin pynlong lang ia ka joint patrolling teams na ka bynta ban teh lakam ia ka jingjur ka jingiatyngkhuh hapdeng ki hati bad ki briew ne human-elephant conflict (HEC) ha kane ka dong ka thain.
Kane ka jingdawa kala wan ha ka por ba don ka awareness-cum-community interaction programme kaba la long ha ka 25 tarik mynta u bnai Nailar ha Lahapara, ka shnong kaba don ha khappud Assam bad Meghalaya ha kaba ki nong shong shnong na ki ar tylli ki jylla kila mad ïa ki jingshah pynjulor ki jingthung jingtep, ka jingpynjot ïa ki mar ki mata, bad ki jingma ïa ka jingim namar ka jingleit jingwan jong ki hati man ka por.
Ia kane ka programme la pynlong da ka biodiversity conservation organisation Aaranyak, ha ka jingiatrei lang bad ka Lakhipur Forest Range ha Goalpara, Assam, bad ka West Garo Hills Wildlife Range na Meghalaya, da ka jingkyrshan na ka Darwin Initiative, ka British Asian Trust bad ka Goalpara Forest Division.
Palat 90 ngut ki nongshong shnong kynthup 40 ngut ki kynthei ki la wan ban ïashim bynta ha kane ka jingïalang ryngkat ki heh sorkar bad ki nongsumar mariang. Ki jingai jingmut ba kongsan kiba la mih ki kynthup ban buh ia ki solar street light, ki iing ban peitngor ne ki watchtower, ban pynkhlain ia ki solar fencing bad kaba kongsan tam eh ban thaw ia ka kynhun ban ia ka kynhun ban ia pahara lang na Assam bad Meghalaya ban pynduna ia ka jingiatynkhuh bad ki hati.
“Sngewthuh ïa ki jaka ba ïaid ki hati bad ban kiar na ki rukom rep marwei, ka long kaba kongsan bha na ka bynta ban pynduna ïa ka jingïatyngkhuh,” ong u Dharmendra Das, u Range Officer ka Lakhipur Forest Range. U la ban jur ia ka jingdonkam jong ka jingkyrshan jong ki paidbah ha ka jingsumar ia ka mariang.
U Oshim B. Sangma, u Forester-I ka West Garo Hills Forest, u la ban jur halor ka jingdonkam ban lait na ka jingiatyngkhuh ki briew bad ki hati (human-elephant conflict) ha ki thain khappud bad dei ban pyntikna ba shibun ki lad ki lynti yn dang ia pyrkhat.
Na ka liang jong ki nong shong shnong, u Sanjib Rabha, u Rangbah shnong ka Khokapara (Meghalaya), u la kyntu ban ia don ka jingiatrei lang. “Ngi kwah ba ka Meghalaya Forest Department kan ia trei lang ryngkat ryngkat bad ki nong shong shnong kumjuh ruh bad ka Assam Forest Department. La donkam kyrkieh ïa ka kynhun ba aiti lut bad ka kynhun peitngor bha khnang ban ïada ïa ki hati bad ïa ki jingdon jingem jong ngi,” u la ong.
Kiwei pat ki nongshong shnong, kynthup ïa u Norway Rabha na Belguri (Meghalaya) bad u Nripen Rabha na Batapara (Assam), ki la pynsngew ban don ïa ka joint patrolling nalor kiwei de.
U Anjan Baruah jong ka Aaranyak u la batai ïa ka jinglong ki hati bad ki sienjam ban pynduna ïa ka jingeh, da kaba ai ïa ki nongshong shnong ïa ki kam ba dei ban leh bad ban pynduna ïa ka jingïatyngkhuh.“Ka jingïa donlang ryngkat ka long kaba lah, lada ki paidbah bad ki heh ophisar ka tnad Forest ki ïatreilang ryngkat,” u la kdew
U nongialam ka jaitbynriew kum u Madhuram Rabha, uba dei ruh u Executive Member barim jong ka Rabha Hasong Autonomous Council, bad u Aswini Basumatary, u President ka Pukhuripara GP, kila ai ka jingiaroh ia ka sienjam ba la shim da ka Aaranyak ban wanrah ka jingiadei ba jan hapdeng ki ophisar bad ki paidbah nong shong shnong.
