Tura Nailar 28: U Myntri Rangbah ka jylla u Conrad K. Sangma, hynne ka sngi Palei ula lum ia ka jingialang bad ki heh ophisar hapoh Circuit House, Tura, West Garo Hills ban iakren ia ka jinglong jingman ha kaba iadei bad ka Tura Medical College, ka jingtei ia ki jaka ialehkai bad ka rukom pyntreikam ia ka Jal Jeevan Mission (JJM).
Ha kane ka jingialang la iatai na ka bynta ban shimkhia ia ka jingpyniaid shakhmat ia ki projek, ban pynbeit ia ki jingeh kiba mih bad ban pynthikna ba dei ban pyndep ha ka por kaba la buh, ia ki sienjam kiba kongsan kiba don bynta bad ki nongshong shnong.
U Myntri Rangbah ula banjur ba kitei ki jingialang kim dei tang ban tip ia ka jinglong jingman hynrei ban thaw ia ki jaka na ka bynta ki ophisar kaba kin lah ban pynsngew laitluid ban pynsngew iaki jingeh bad ban tyrwa ia ki lad ban weng ia ki jingeh. Ula pynpaw ba ka sorkar ka iengskhem ha kaban shimkhia lang ia ki diengpyngkiang bad ban wad ia ki lad ki lynti ban lah ban iaid shakhmat.
Ha kaba iadei bad ka jingiaid ka kam jongka Tura Medical College, ki ophisar kila pyntip ba ka jingshna ia ki jingtei kala kot sha ka 78 percent bad kala iaid beit ban pyndep ha u Nailar 2026. Kaba la tei ha ka jaka kaba iar kaba don 84 akar, kane ka projek ka kynthup ia ka 47,000 square meter ka jaka na ka bynta ka jaka pule bad ka jaka treikam bad 14,096 square meter na ka bynta ka Hospital ai jinghikai. Ka hospital kan kynthup ia ki 735 tylli ki jingthiah.
Hynrei la pynpaw ruh ia ka jingsngewkhia halor ka jinglong jingman jong ka surok, khamtam ia ka jaka kaba noh bha hajan ka jingkieng kaba donkam ban pynwandur bha. Ki jingdonkam na ka bynta ki nonghikai kadei kaba don hapdeng ka jingeh kaba khraw, ha kaba ki jingdonkam na ka bynta ki Professors, Associate Professors, Tutors bad Residents ka long kaba eh ban pynbiang ha ka jaka pule.
Halor ka Shillong Medical College, ki ophisar kila pynthikna ba kila khmih lynti ba ki klas kin sdang ha u Nailur 2025. Ka jingshim ia ka “Admission” yn pynlong lyngba ka 15 percent All-India Quota bad State Counseling Process.
U Myntri Rangbah ula pynpaw ba hapdeng ki snem 2030, lyngba ka jingpyntreikam ia ka Shillong, Tura bad ka USTM medical college, ka Meghalaya kan pynmih palat ia ka 550 ngut ki doctor man la ka snem, kaban pynduna ia ka jingshaniah ka jylla ha ka Central Pool Seats bad ban pynkhlain ia ka rukom ai ia ka jingsumar.
Ka jingialang kala pynleit jingmut ruh ha kaba iadei bad ki jingtei ia ki jaka bad madan ialehkai, u Myntri Rangbah ula ong ba ka kam ialehkai dei ban saindur naduh na ki shnong ki thaw bad ki Block lyngba ka jingthaw ia ki jingtei kiba donkam, ka jingithuh ia ki jaka bad ban buh ia ki coach ban ai jinghikai.
Ula banjur ia ka jingdonkam ban khlain ka jingiadonbynta lang jong ki Club bad ki Association ha ka shnong ban saindur ia ka sap ki nongialehkai, ban pynlong ia ki jingiakob kiba man la por khnang ban pynthikna ia ka jingbun jong ki nongiashimbynta, ha ka Chess bad Athletics kiba long ki bynta kiba khlain ha kylleng jong ka jylla.
La pynpaw ruh ia ka jingsngewkhia halor ka jingbym don ia ki Coach kiba tbit bad ki Refree.
La iatai ruh ia ki jingtyrwa na ka bynta ki capacity-building programs, ban ai jinghikai ia ki ophisar bad ban pyndonkam ia ki nongialehkai kiba la shongthait na ka kam ban noh synniang ha ki jingai jinghikai ha ki shnong ki thaw.
U Myntri Rangbah ula bthah ia ki ophisar ban pyniaid ryntih ia ka rukom ban don ia ka jiniadei bad jingiajan, ban weng ia ki jingeh bad ban pynkhreh ia ka rukom treikam ban kyntiew ia ki jingialehkai ha ki shnong ki thaw.
Nalor kane la iakren ruh ha kaba iadei bad ki jaka, ryngkat ki jingtyrwa ban kyntiew ia ki Multipurpose Complex kiba lah ban shakri kum ka Administrative, Secretariat bad jingdonkam ha ka kam ialehkai. U Myntri Rangbah ula pynpaw ia ka jingkongsan ban pynneh pynsah bad jingiohi jngai ha ka rukom pynwandur bad ka banjur iaka jingdonkam ban pyndep ia ki projek ha ka por kaba la buh ka long kaba kongsan tam.
Nalor kane kila iatai sani bha ruh ha kaba iadei bad ka Jal Jeevan Mission, ha kaba ka kaiphjod kala pynpaw ba la pyndep 90 percent ia ki kam, la kubur ba kala don pat ka jingiapher na kaei kaba long, ha kaba jan 20 percent jong ki longiing kiba dang mad ia ka jingkyrduh um.
U Myntri Rangbah ula banjur ia ka jingdonkam ban leh ia ka Audit ha ka jylla baroh kawei ban lap kiei ki jait skhim kiba treikam bha bad kiei kiba la pulom noh, khnang ba yn lah ban shim ia ki lad ban pynbeit ia kine ki jingeh. Ula pynpaw ruh ba ha ki jaka lum, ka jingduna ka bording kala ktah bha iaka jingpynbiang ia ka umbam umdih, katba ha ki jaka kiba kong rithor ka jingpyndonkam ia ki projek Solar ka dang duna bha.
Ka jingbym treikam bha ki Village Water and Sanitation Committee kadei kaba la lap ba kala long ka diengpynkiang, ha kaba bun ki committee kim shym la treikam bad kyntait ban shim ia ka jingkitkhlieh khlem ka jingioh jingkyrshan pisa.
La pynpaw ruh ha ka jingbym biang ka rukom bei tyngka, ha kaba jan T.2,000 Klur la pynsahteng ban siew sha ki kontraktor namar ka jingpynslem ha kaban pyllait ia ka pisa na ka sorkar India. U Myntri Ragbah ula pynpaw ia ka jingkyrmen ba kane ka jinglong jingman kan sa bha noh hashwa ban kut u snem.
.){kind=link}