Shillong, Nailar 28 : Ka Indian National Congress (INC) ha ka sngi Palei, kala leit buh ia ka jingujor ba thymmai hakhmat u Lamphang ka Iingdorbar Thomas A Sangma, ba dawa ban mait kyrteng noh ia ki 4 ngut ki MLA jong ka party kiba leit pyniasoh sha ka National People’s Party (NPP).
Ia kane ka jingujor bala mudui da u Secretary ka Meghalaya Pradesh Congress Committee (MPCC) Manuel Badwar la aiti ha u Commissioner & Secretary ka Assembly Andrew Simon, uba la pdiang na ka bynta u Lamphang.
Kat kum ka jingong u bah Badwar, ka jingujor ka dei kaba la pynshong halor ka nongrim ba kane ka jingphet seng ki MLA kam shym la iaid kat kum ka kyndon ar-lai bynta ka jingdon paid ba donkam.
Ia kane ka jingujor la mudui hapoh ka Rule 6 jong ka Meghalaya Legislative Assembly (Disqualification on Ground of Defection) Rules, 1988, pule lang bad ka para 2(1)(a) jong ka Tenth Schedule to the Constitution of India, 1950.
Kane ka jingujor kala wan jia hadien ba u MLA ka Mylliem Bah Ronnie V Lyngdoh ula mih noh na ka Congress bad weng noh ia ka jingujor bala mudui sha ka Iingkashari Meghalaya High Court, kaba long pyrshah ia ki lai ngut ki MLA-Dr Celestine Lyngdoh (Umsning), Charles Marngar (Mawhati) bad Gabriel Wahlang (Nongstoin).
U Bah Ronnie V Lyngdoh ula leit pyniasoh sha ka NPP kaba don ha ka Liang Synshar myn ha ka 30 tarik Naitung katba ki laingut ki MLA, kila leit iasoh ha ka 19 tarik Nailar 2024.
Na ka liang u Lamphang ka Iingdorbar ula dep ai ka jingithuh ia ka jingpyniasoh kine ki 4 ngut ki MLA sha ka NPP.
Ka Congress, kaba jop 5 ngut ki MLA ha ka elekshon Assembly 2023, kala sah nod ha ka Iingdorbar ba 60 ngut ki dkhot. Na kine ki 5 ngut, u Saleng A Sangma, ula iehnoh ia ka kam MLA ka Gambegre hadien ba ula shah jied kum u MP Lok Sabha ka Tura.
“U Lamphang un sa shong bishar ia ka jingujor bad un sa ai ia ka rai jong u. Lada ka Congress kam pat sngewhun ia ka rai u Lamphang, ka lah ban leit tied ia ka jingkhang ka Iingkashari” ong u Bah Simon.
Haba iakren bad ki nongthoh khubor hadieh ba dep buh ia ka ujor, u Bah Badwar ula ong ba ka rai jong ki MLA ban iehnoh iala ka party kam shym la iaid satia kat kum ka ain, naba arngut ki MLA kila kynthih shuwa nyngkong na ka jhad, bud sa uwei hadien 48 kynta, katba uba saw u dang pynkhreh ban mih.
U Bah Badwar ula ong, kane kam shym iahap kat kum ka kyndon ba 66% lane 2 na ka 3 bynta ka jingdon paid ba donkam ban leh ia kane ka kam.
“Ka INC ka iakhun ia kane ka mukotduma ym ban pynhiar kput ne jingbuhshun hynrei namar ka ngeit ha ka jingbat ia ka ain ka Ri” ula ong.
Haba pynpaw ba ka riti synshar paidbah ka don ha ka jingma bad ka jingleh jong kine ki MLA ka long pyrshah ia ka Riti Synshar ka Ri India, une u Nongialam ka Congress ula ong ba ka party ka thmu ban pyni ba ki MLA kim dei ban khein dewthala ia ki party ne ka jingjied u paidbah.
 ha ka sngi Palei, kala leit buh ia ka jingujor ba thymmai hakhmat u Lamphang ka Iingdorbar Thomas A Sangma, ba dawa ban mait kyrteng noh ia ki 4 ngut ki MLA jong ka party kiba leit pyniasoh sha ka National People’s Party (NPP).){kind=link}