Imphal, Nailar 27: Ki nongialam jong ki lai tylli ki seng Naga kiba don ha jylla Manipur ha ryngkat bad ki ophisar ka tnad Ministry of Home Affairs (MHA) kila pynlong ka jingialang halor ka jingdawa ban pyntrei kam biang ia ka Free Movement Regime (FMR) bad ban pynsangeh noh ia ka jingker sainar kaba dang iaid ha shilynter ka khappud India-Myanmar.
Ka kynhun na ka MHA la lam khmat da u A. K. Mishra, katba 11 ngut ki dkhot ka kynhun Naga ba la lam khmat da u President ka United Naga Council (UNC) u Ng. Lorho bad ba kynthup ia k I nongmih khmat jong ka UNC, ka All Naga Students’ Association, Manipur (ANSAM), bad ka Naga Women’s Union (NWU).
U nongaiktien jong ka UNC u la ong ba ka jingialang ha New Delhi ha ka sngi Ba-ar ka long kaba “bym lah ban pynkut”.
“Hadien ba ngi la wanphai sha Imphal ha ka sngi Balang, ngin sa ïakren ïa ka jingmih na ka jingïalang bad ka MHA bad ngin sa rai ïa ka lynti ban shim kam kaba hadien,” u la ong.
Ka UNC kham ha shwa kala ai por ia ka sorkar kmie bad kila pynlong ka jingialang bad u Lat ka jylla Manipur u Ajay Kumar Bhalla ha ka 16 tarik u Nailar ban ia thir halor ka jingpyntreikam biang ia ka FMR kaba rim bad ban sangeh noh ia ka jingker khappud ha shilynter ka khappud India-Myanmar kaba jrong 398 km bad ka Manipur.
Ka UNC bad kiwei pat ki khynhun Naga kila pynlong ka jingiakhih ban kyrshan ia kane ka jingdawa naduh myn shem snem, da kaba pyrshah ïa ka “jingpynduh noh shiliang ïa ka FMR bad ka jingshna ïa ki jingker ha khappud India bad Myanmar”.
Ka jingialang kaba la long ha ka sngi Ba-ar bad ki ophisar ka MHA ha New Delhi bad ka jingialang hapdeng ka UNC bad u Lat ka jylla ha ka 16 tarik u bnai Nailar ha Imphal kala wan ha ka jingïakynduh jong ka jingkut noh ka jingai por ba 20 sngi ba la ai da ka UNC sha baroh ar ka sorkar pdeng bad ka sorkar jylla ha kaba ïadei bad kaei kaba ka la batai kum ka “jingpyndam shiliang” ïa ka kam ker kynroh kaba dang ïaid shakhmat ka FMR.
U Myntri Rangbah ka jylla Nagaland u Neiphiu Rio, haba kren ha ka sngi Independence Day ha Kohima, u la pynpaw ïa ka jingsngewkhia halor ka rai jong ka Centre ban pynduna ïa ka FMR ha shilynter u khappud ka India bad ka Myanmar na ka 16 km mynshwa sha ka 10 km bad ban khanglad ïa ka jingïaid lynti sha ki khyndai tylli ki crossing point.
U la kyntu ia ka sorkar pdeng ban long kaba kham jem bad ban bishar bniah ia katei ka mat.
Ka MHA ha u snem ba la dep ka la pynbna ba ïa ka FMR, kaba kham mynshwa ka la ailad ïa ki briew kiba sah ha khappud ka India bad ka Myanmar ban ïaid 16 km shapoh u pud u sam khlem da donkam visa, yn sa pynduh noh shen.
 kila pynlong ka jingialang halor ka jingdawa ban pyntrei kam biang ia ka Free Movement Regime (FMR) bad ban pynsangeh noh ia ka jingker sainar kaba dang iaid ha shilynter ka khappud India-Myanmar.){kind=link}