Shillong Nailar 25: Ka jingthmu ban shna pynheh ia ka Baljek Airport ha West Garo Hills district kala sdang ioh ia ka jingphaikhmat, haba u MP ka seng Congress na Tura u Saleng A Sangma ula shimkhia ban pynbor ba dei ban shna pynheh noh ia kane ka kad liengsuin ban lah ban pdiang ia ki liengsuin kiba heh.
Kumba long mynta kane ka kad liengsuin kala pynkhreh ban sdang ia ka jingai jingshakri ia ka liengsuin kaba don 20 tylli ki jaka shong lyngba ka UDAN scheme, hynrei u Sangma u ngeit skhem ba kane ka kad liengsuin ka don bhai a ka kabu ban ai jingshakri da ki liengsuin kiba heh lyngba ka jingpynheh bad jingpyniar ia ka kad liengsuin.
“Nga lah dep ban phah ia ka shithi sha u Myntri Rangbahduh ka ri bad ia u Myntri uba dei khmih ban pyniar na ka 20 seat sha ka 75 seat ia ka liengsuin khnang ba kan lah ban ai ia ka hok na ka bynta ki paidbah ka jylla” la ong u MP haba iakren bad ki nongthoh khubor hynne ka sngi nyngkong.
U Sangma ula ong ba ka sorkar Meghalaya dang shen (ha ka 6 tarik u Jymmang) kala iasoi ia ka Memorandum of Understanding (MoU) bad ka Airports Authority of India (AAI) ban sdang pyntreikam noh ia ka Baljek Airport.
Hynrei ula ong ba ym shim la kynthup pat ia ka Baljek Airport ha ka map jong ka AAI hashwa ban iasoi ia ka MoU, kaba la pynmih ia ka jingkylli shaphang ka jingpynbha ia kane ka kad liengsuin.
“Nga lah kylli ia ka jingling jingman jong ka Baljek airport ha ka jingialang kaba la long ha New Delhi ha u Nohprah (mynshem snem). Ka jubab kaba nga lah ioh ka long ba ka jingialang jong ka AAI kaba la long ha Lakshadweep ha u Kyllalyngkot kala ong ba ka Baljek Airport kam shim la don ha ka map jong ka AAI”.
“Namar ba ka sorkar Meghalaya kala dep iasoi ia ka MoU bad ka AAI, Baljek airport mynta ka lah ban shah kynthup lang (ha ka map). Mynta kila pan ia ka lisen. Ha katei ka por, kam shim la don ka jingpan lisen da ka sorkar Meghalaya. Ka Baljek Airport kala long ka kad liengsuin jong ka sorkar jylla bad kam dei kaba hap satia hapoh jong ka AAI,” ong u Sangma.
Ula buh jingkylli ruh “Ngam tip balei ka (Sorkar Meghalaya) kila wan ialam ia ka President jong ka ri ka Pratibha Patil ha katei ka por… khlem ka jingdon ia ka lisen kaba biang ban wan hiar ka liengsuin”.
U Sangma ula ong ba ka sorkar jylla kala iasoi ia ka MoU tang na ka bynta ka liengsuin kaba don 20 tylli ki jaka shong ne 20-seater kaba long pyrshah ia ka jingkhmih lynti jong ki paidbah ba ka kad liengsuin kadei ban pyniar bad pynheh noh ban ioh wan hiar ki liengsuin kiba heh.
U MP ula ong ruh kala don khyndiat ka jingpynbha bad ka jingpynheh, ka Baljek Airport ka jan iasyriem bad ka Lakshadweep Airport.
Lah ban kdew ba ka AAI kala kyrpad ban ai jaka shuh shuh ban shna pynheh ban ioh ban pyntreikam pura bad ka sorkar jylla kala mynjur ban shim sa 125 akar na ka bynta ka wat kaba nyngkong bad ban shim jaka sa 115 akar na ka bynta ka wat ka baar.
Ka jingthmu kaba hakhmat eh ka long ba ia kane ka kad liengsuin dei ban sdang pyntreikam noh mardor da kaba ai jingshakri da ka liengsuin kaba 20-seater bad ka thmu ban pyndonkam pat da ki liengsuin ATR-72 ha ki snem kiban sa wan.
Kham hashwa, u Myntri Rangbah ka jylla u Conrad K Sangma ula pynpaw ia ka jingskhem jingmut ba kane ka Baljek Airport kan sa sdang treikam noh naduh u snem 2026.
