Pynbna ka Sorkar ia ka Chief Minister’s Scholarship Scheme ban kyrshan ia ki Samla Pule

T.6000 shisnem yn ai ia ki samla pule kiba shong ba sah ha Meghalaya

Shillong, Nailar 25 : Ka Sorkar Meghalaya kala pynmih ia ka jingpynbna ban sdang pyntreikam noh ia ka Chief Minister’s Scholarship Scheme (CMSS), 2025, ka prokram bala wanrah da u Myntri Rangbah Conrad K Sangma ha ka mang tyngka 2025-26 ka Jylla.

Ia kane ka Scheme la pynwandur khnang ban pyniar ia ka lad ban ioh ia ki jingpule kiba kham shalor, ban kyntiew ia ka jingnang jingstad, bad ban pyniar ia ka jingkyrshan pisa sha ki samla pule ka Meghalaya naduh ka Class XI haduh ka kyrdan Ph.D., kiba pule ha ki jaka pule ba la ithuh hapoh bad shabar ka Jylla.

Kat kum ka jingpynbna, la ong ba ki samla pule kiba dei hok ban ïoh ïa ka skhim, kin ioh T.6000 ba la buh ha ka shisnem, ïa kaba yn sa thep beit beit sha ki bank account jong ki.

Ka CMSS ka long kaba kyrpang namar ba kam don ka jingbuh kyndon ia ka jingiohkamai na ka bynta ki nongaplai, kaba pynthikna ba baroh ki samla pule kiba dei hok kiba shong ba sah ha Meghalaya kin ioh jing myntoi. Ki samla pule kiba pule ia ki jingpule ba man ka por ha ki jaka pule sorkar, ki riew shimet, bad ki jaka pule ba la ithuh da ka ri ki lah ban apply.

Ban pynthikna ia ka rukom pynlait ia ka skhim ha ka lynti kaba shai bad kaba paka, yn pdiang ia ki aplikeshon tang lyngba ka online. La buh ruh iaka web portal ba kyrpang (https://meghalayaone.gov.in) ba kan treikam live naduh ka 1 tarik Naiwieng 2025, ka ban dei ka sngi ba ki samla pule kin sdang ban phah ia ki aplikeshon.

Ki kot ki sla kiba donkam ki kynthup ia ki syrnot nongshongshnong/ ki ID kum ka MHIS Card, MGNREGS Job Card, EPIC lane PDS card, ka mark sheet jong u snem bala lah, ka passpost size ba dang shu shon thymmai, bad ka bonafide certificate na ki Principal/Headmaster ki jaka pule.

Haba ai jingkren ha ka jingpyllait ia kane ka skhim, u MYntri Rangbah ula ong ““Ka jingnang jingstad ka dei ka nongrim na ka bynta ka lawei jong ki samla jong ngi. Lyngba ka Chief Minister’s Scholarship Scheme, ngi kut jingmut ban weng ïa ki jingeh ha ka liang ka pisa tyngka bad ai bor ïa ki samla ka Meghalaya ba kin lah ban bud ïa ki jingangnud jong ki da ka jingshaniah skhlem halade.”

Ka Tnad Pule Puthi ka kyntu ia baroh ki samla pule ba dei hok ban ioh ia ka skhim, ba kinsdang ban aplai naduh ka 1 tarik Nailur 2025 bad ban shim ia kane ka kabu.