Kohima, Nailar 25: Ka kynhun jong ki san tylli ki Jaitbynriew Nagaland ki la kyntait ia ka jingkhot ban leit sha ka jingialang bam smai jong u Lat ka jylla Nagaland kaba la long ha Kohima.
U Lat ka Jylla Manipur, u Akay Kumar Bhalla, la buh ba un shimti shuh shuh ia ka jingkitkhlieh jong ka Jylla Nagaland, ha ka sngi Nyngkong, hadien ka rai jong ka President ka Droupadi Murmu, hna ka daw ka jingkhlad noh jong u Lat ka jylla Nagaland u La Ganesan.
Kane ka kynhun ba kynthup ia ka Angami Public Organisation, ka Ao Senden, ka Lotha Hoho, ka Rengma Hoho, bad ka Sumi Hoho, ki la pynbna ba ki nongmih khmat jong ki, kin kiar na katei ka jingbam smai, da kaba kdew ia ka rai pyrshah jong ki, kaba la pdiang ha ka 9 tarik Nailar.
Ki san tylli ki jaitbynriew ki la dawa ban bishar bniah ïa ka state’s reservation policy, ha kaba kila kynnoh ruh ba ka ai jingmyntoi khlem jingïahap ïa ki 10 tylli ki jaitbynriew Naga kiba la tip kum ki “backward” Naga tribes.
Ka Committee on Review of Reservation Policy (CoRRP) ka la kynthoh ruh ïa ka rai jong ka kynhun myntri sorkar ka jylla ban thaw ïa ka Job Reservation Commission kaba don hynniew ngut ki dkhot kaba la khlieh da u Indian Administrative Service (IAS) officer ba la shongthait jong ka Nagaland Cadre
