Shillong, Nailar 22 : Uwei u Samla na ka shnong Khonjoy A, South West Khasi Hills, ula lait salit na ka tyrsim jong ka jingiap ha ka jingiakhun bad ki runar ba wan pyntriem na ri Bangladesh dang shen ha ka thain Khonjoy. Une u Samla u dang ehrngiew namar ka jing bym bthei u kuli na ka ktang suloi u runar Bangladesh.
Une u samla u kyrteng u Arman D Marak ba 27 snem ka rta, khun jong u Boden Sangma.
Ka dei ha ka 7 tarik Nailar, kumba 8-9 ngut ki runar ba Bangladesh bala kiengatiar bha, kila wan rung jubor hapoh ka shnong Rangdonggai, South West Khasi Hills da ka jingthmu ban rahbor ia uwei u samla ba kyrteng u Balsrang Marak.
Kine ki runar kila rahbor ia une u samla sha ka shnong New Rangdonggai da ka jingthmu ban sa kit pat sha Bangladesh hynrei une u samla ula ioh phet bad leit rieh ha kawei ka Iing. Kine ki runar kila thwet ia u bad hadien ba ki shem ha kane ka Iing, kila shoh dusmon ia u haduh ba ula mynsaw jur bad sa phet krad noh na kane ka jaka.
Ha ka step kaba bud, kata ha ka 8 tarik Nailar, kine ki runar kila leit rieh noh ha kawei ka quarry mawshun bad hangne kila lap ia 3-4 ngut ki khynnah bad kila set jubor ia kine ki khynnah ha kane ka quarry bad phah shet jingshet na ka bynta jong ki.
Uwei napdeng kine ki Khynnah ula ioh phet na katei ka jaka bad mar mar ula leit ban pyntip sha ki paidbah bad kumjuh ruh sha ki Pulit, kiba la hiar mar mar sha katei ka jaka bad kila siat ruh da ka suloi sha suin ban pyntieng ia kine ki runar. La iathuh ba ha kane ka jingjia, kine ki runar na Bangladesh kila phet krad bad khlem ioh kem satia.
Hynrei dei ha ka 9 tarik katba kine ki runar ki dang thmu ban wan dih sha ha shnong Khonjoy, ki nongshongshnong mar sien iohi ia kine ki briew kila ishankhmat bad sdang iapeit bha ia ka rukom leh jong ki.
Kine ki runar haba iohi ia ka jingi pher ia ka rukom leh ki nongshongshnong, kila phet noh na ka dukan sha khlem da dih shuh ia ka sha bad dei ha kane ka por ba kila iakynduh ia uwei u samla na Khonjoy A, uba la bat ia ki ban kylli jingkylli bad poi sha ka jingiakhru.
Ha kane ka jingiakhru, uwei na ki runar ula siat da ka pistol ia une u samla hynrei donbok ba u kuli u khlem bthei satia bad da ka jingwan poi ki paidbah, lah ioh ban bat noh ia 3 ngut ki runar.
