Shillong Naialr 22: Ka Synjuk Ki Nongsynshar Shnong Ka Upper Shillong kala pynpaw ia ka jingbym hun ia ka jingiaid bad ka rukom pyntrei ia ka surok Four-Lane na Jingkieng Umshyrpi shaduh sha 7 Mer Umdiengpun, Upper Shillong da ka National Highways and Infrastructure Development Corporation Limited (NHIDCL).
Kane kadei shi bynta jong ka Shillong – Dawki Road project.
Ha ka sngi Palei ka Synjuk kala lum ia ka jingialang kaba kyrkieh ha Nongkseh Community Hall ban iakren halor ka jingsuki ka rukom shna ia ka surok Four Lane, kaba la ktah jur ia ki paidbah jong ka thain.
Ka Synjuk da kawei ka sur kala rai ban shimkhia ban buddien ia kane ka kam kaba iadei bad kane ka projek shna surok.
“Haba pynpra ia ka kynroh maw hajan ka Jingkieng Umshyrpi dei ban shim ia ki lad jingiada na ka bynta ka jingshngain jong ki nongshong shnong bad ki nongleit nongwan. Nalor kata, kam dei ruh ban ktah ia ka surok kaba la don lypa ne ban pynmih ia ka jingdheng kali kaba jur” kala ong.
Ka Synjuk kala pynpaw ruh ia ka jingsngewkhia halor ka jingshah ktah ka tyllong um jong ka shnong Lummawbah bad ia ka jingshngain jong ki briew kiba leit tong um bad ban sait jain ha ka jaka sait jain ba marjan.
Ka Synjuk kala kdew ba ka NHIDCL kala pulom ha kaban leh eiei halor ki thliew ba mih ha ka surok naduh ka jingkieng Umshyrpi shaduh sha 7 Mer watla kala ai ia ka jingkular ha ka jingleit jurip lang ha ka 17 tarik u Jylliew. Kane kala pynmih ia ka jingdheng kali kaba jur bad pynsyrtok ia ka leit ka wan jong ki paidbah.
Ka Synjuk kala pynpaw ruh ia ka jingbynniaw ba ki surok kiba pyniasoh sha ki shnong, ia kaba la mynjur ha ka jingleit jurip lang, la shu ieh khlem kano kano ka jingpeit jingkhmih bad kane kala buh ha ka jingeh kaba khraw ia ki paid nongshong shnong, ki khynnah pule bad ki nongkhaii.
.){kind=link}