Shillong Naialar 20: U MDC ka Laban-Mawprem Constituency Bah Ricky Shullai ula kyntu ia u Myntri kam Jngohkai Bah Paul Lyngdoh ban pynlong ia ka jingjurip bad baroh ki kynhun ba donbynta kynthup ia ki Dorbar Shnong ia ka Shillong Peak Ropeway Project hadien ba mih ka jingkynnoh pynkhyllem ia ki dieng hajan ki ‘Catchment Area’ kaban buh ha ka jingma ia ka tyllong um ha katei ka thain.
Haba iakren bad ki nongpathai khubor ha ka sngi Balang, u Bah Ricky Shullai ula ong ba watla kane ka projek kala ioh ia ka jingkyrshan na ki nongshong shnong, hynrei dang shen ka jingpynkhyllem ia ki dieng hajan ka ‘Catchment Area’ kaba kongsan bha, kala pynmih ia ka jingsngewkhia shaphang ka jingpynneh pynsah ia ka tyllong um bad ka jingshah ktah ka mariang.
Ula kdew ruh ia ka hukum kaba la pynmih dang shen da ka iingkashari Meghalaya High Court kaba la thung ia u Special Officer ban khmih ia katei ka jaka, ha kaba iadei bad ka PIL kaba la mudui da u Bah Geraldine G Shabong.
“Nga la kyrpad ia u Myntri Sorkar ban pynlong ia ka jingjurip lang bad baroh ki kynhun ba donbynta kynthup ia ki Durbar Shnong, nongialam shnong bad ka tnad jngohkai, khnang ba kane ka projek kan lah ban iaid ha ka lynti kaba khuid ba suba bad da kaba buh hakhmat ia ka roi ka par bad ka jingiada ia ka mariang” ula ong.
U Bah Shullai ula banjur ia ka jingdonkam ban pyndonbynta lang ia ka shnong ka thaw ha ka jingpyniaid shakhmat ia kane ka projek ban pynthikna ba kan ai jingmyntoi ia ki samla ka thain bad ban kyntiew ia ka kam jngohkai da kaba burom lang ia ka jingsngewkhia ka shnong ka thaw.
U Bah Ricky Shullai ula aiti ruh ia ka dorkhas ha u Bah Paul Lyngdoh uba khmih ia ka tnad Texitiles ha kaba ula kyrpad ban ai jaka ban buh ia ka Fire Service Station ha Mulberry Seed Production Centre, Lawsohtun.
Kane ka jingbuh ia ka Fire Station kala sahteng namar ba kala mih ka jingiakajia na ka jingiakam trai ia ka jaka ha Maxwellton, Kench’s Trace.
U Bah Shullai ula banjur ia ka jingdonkam kyrkieh ban don ia ka Fire Station, da kaba pynpaw ia ka jingsngewkhia halor ka jingshngain bad ka jingduna ha kaban leit ai jingiarap kyrkieh ha ka thain Raid Laban.
