Shillong, Nailur 09: Ka Federation of Khasi Jaiñtia & Garo People’s (FKJGP) Sengkmie ka pynpaw iaka jingbitar halor ka jingwanrah jong ka sorkar MDA iaka kaiphod (report) ka bym shai satia bad kaba pynartaien haba iadei bad ka jingtohkit ia ka jingshah siat iap u Nongialam barim ka HNLC Bah Cheristerfield Thangkhiew.
Ia kane la pynpaw da u President ka FKJGP Bah Dundee C Khongsit uba la ong ba ka jingbuhrieh noh ia ka kyrteng jong ki Nongsakhi ha ka kaiphod ka pynartatien shibun.
“Kan don jingeh aiu ia ka Sorkar ban sei madan ia ka kyrteng jong baroh kiba don kti nalor bala pynslem lypa ia ka por ban pyndep ia ka jingtohkit haduh shisnem duna” ong u Bah Dundee.
“Nalor kata sa ka pynslem haduhsaw bnai ban sei madan ia ka kaiphod hadien ba u Nongbishar ula dep aiti, kata naduh u bnai Jymmang”ula bynrap.
Une u Nongialam ka FKJGP ula ong ba kane ka jingleh ka Sorkar kala pynbitar ym tang ia ka Seng hynrei ia ki paidbah ka Jylla, kaba lah ruh ban pynklang sa shisien pat ia ka ding jong ka jingiakhih paidbah kaba kham shyrkhei ban ia kaba jia ha u snem bala leh.
U Bah Dundee u ong ba ka Seng ka kyntu ia baroh 60 ngut ki MLA bad ruh ia baroh ki seng sain pyrthei ba kin pynthikna ba ki briew kiba dkhat jubor ia ka mynsiem u Bah Cherist ki dei ban ioh ia ka jingpynsajia kynthup naduh ki nongphah haduh ki nongleh ruh kumjuh.
“Ka long kaba donkam ban ai jingpynsajia khnang ba kan ym long ka raibi ba kita ki nongbat ain kin kylla long ki nongpynkhein ain” ula ong.
U pyntip b aka FKJGP kan sa shong pyrkhat halor kane ka kam haba pynpaw ba lada ka jingdawa jong ka seng kam poi shano shano ruh, ka seng kam banse ban shim da kiwei pat ki sienjam.
