Agartala, Nailar 18: Ka jingklumar kala khie kynsan ha ka thain Tilabazar jong ka Kailashahar jong ka Unakoti district ha ka janmiet sngi u Blei, hadien ba ka doh sniang bad ka shithi la lap na Tilabazar Jama Masjid kaba la rim da ki spah snem ha Tripura.
Na ka liang ki pulit mardor kila leit ban tuklar halor kane bad la lah ban tehlakam ia ka jinglong jingman.
Katkum ka report, u Imam jong katei ka Mosque u la iohi nyngkong ia kawei ka pla plastic kaba la sahkut ha madan jong katei ka Mosque ha ka por mynmiet. Haba ki nongshong shnong ki la plie ia ka, ki la lap ia ka doh sniang ryngkat bad ka shithi.
Ha katei ka shithi, la kam ba ka Tripura shisien kadei ka jylla jong ki Hindu, da kaba kynnoh ba ka jaka jong ka Tilabazar Jama Masjid, ha kaba sdang, ka dei jong u Gaur Govinda, ha kaba ka Temple jong ki Hindu, ka la ieng shisien. Kila dawa ban pynpra noh mardor ia katei ka mosque.
Kham hadien, ki paidbah ki la ia lum lang ha katei ka jaka bad ki riew pawkhmat kiba kynthup ïa u nongïalam ba rangbah ka seng Congress uba dei ruh u vice-chairman ka Gournagar Block u Mohammad Badruzzaman, u chairman ka Tripura Waqf Board bad u MLA barim u Moboshar Ali, bad ka Tilabazar Gram Panchayat Pradhan Ahiduzzaman ki la leit wut wut sha katei ka jaka bad ki la pynrem jur ïa katei ka jingjia.
Ki heh pulit kiba kynthup ïa u SDPO ka Kailashahar u Jayanta Karmakar, u OC jong ka Irani police station u Biraj Debbarma, u Additional SP jong ka Unakoti district u L. Darlong, bad u Deputy Magistrate u Mati Lal Debbarma ruh ki la poi sha katei ka mosque ban peitbniah ïa ka jinglong jingman bad ban pynthikna ïa ka jingshngaiñ.
U Acting Superintendent of Police (ASP) ka Unakoti u Avinash Rai u la leit sha katei ka jaka ban peitngor ia ka jinglong jingman.
Haba kren sha ki lad pathai khubor u Rai u la ong, “Don ki runar kiba pyrshang ban pynthut ïa ka jingïatylli, hynrei hadien ba nga la ïakren bad ki nongshong shnong bad ki nongïalam shnong, nga sngewhun ba baroh arngut ki ïatreilang bad ki bor synshar ha ka jingpyrshang jong ki ban wad bad kem ïa kiba donkti.”
U la bynrap ba la buh shuh shuh ia ki bor pahara ha katei ka jaka bad ia ka case la dep ban register bad u la pynpaw ruh iaka jingsngew skhem ba shen yn sa ioh ban kem noh kloi ia ki briew ba leh ia kane ka kam runar.
U SP u la kyntu ia baroh ki paidbah ba kim dei ban pynher klumar ia ki khubor lamler ha ki rynsan social media, bad u la kular ruh ba ka jinglong jingman ha kane ka jaka ka long kaba shongsuk shong sain.
