Rai ka KSU ban pyntrei iala ka ILP ha Meghalaya | Dawa pynkha ia ka Territorial Army ban iada ia ki jaka khappud

Shillong, Nailar 18 : Ka Khasi Students’ Union (KSU) kala rai ban pynjur ia ka jingpyntreikam iala ka jong ka Inner Line Permit (ILP) ha Meghalaya ban tehlakam ia ka jingwan rung kyrthep ki poi ei shapoh ka Jylla.

Ka Seng kala kam ruh ba kam don lad pat da kumwei hynrei ban shim ia ka ain hala ka jong ka kti namar ka Sorkar Pdeng bad ka Sorkar Jylla, kila shu pynslem palat pud ban pyntreikam ia ka ILP ha ka Jylla.

Ka KSU kala dawa ruh ba ka Sorkar Pdeng ka dei ban ai ia ka Meghalaya da ka Territorial Army, kaba iasyriem thik kumba ai ia ka Mizoram, ban iada ia ki jaka khappud ka Jylla.

Haba kren bad ki nongthoh khubor shabar jong ka Sit-In-Strike bala pynlong da ka NESO ha Shillong ha ka sngi Nyngkong, u General Secretary ka KSU samla Donald V Thabah ula ong “Ngi la pynlong la bunsien ia ki jingiakhih ban dawa pyntreikam ia ka ILP. Hynrei, ka Sorkar Pdeng kala sngap man man ban pyntreikam ia ka ILP. Ka Sorkar Jylla kam ishimkhia satia ban buddien ia ka kam bad ka Sorkar Pdeng. Namar kata, ka KSU kam banse ban pyntrei iala ka jong ka ILP hala ka Jylla da ka jingbuh ia ki dkhot ba kin talasi bad beh krad ia ki poi ei bad ki briew ba I artatien, kiba wan rung sha Jylla”.

Haba kylli, u samla Donald ula ong “Ngi hap ban shim ia ka ain hala ka jong ka kti. Ngim banse ban leh ia kane namar ba kam don sati aka ain ban iada ia ka jinglong kyrpang bad ka hok jong ki trai ri trai muluk. Namar kata, ngi sngewsih shibun ba ngi hap ban shim ia ka ain hala ka jong ka kti”.

Haba kren halor ka jinglong jingman ba mynta ha Bangladesh bad ruh ka jingiaid ki kam kyndang mynder ri bala pynlong da ka Sorkar Assam, une u Nongialam ka KSU ula ong “Ngi khuslai bha ba ka jingwan rung ki briew ba shah kyndang na Assam bad ki briew ba mad ia ki jingshah thombor ha Bangladesh, ki lah ban wan rung shapoh ka Jylla”.

Ula pyntip ruh ba hadien ka jingiakhih jong ka NESO, ka KSU kan nang iai bteng ban pynjur ia ka jingkhynra ia ki poi ei kiba wan rung sha Meghalaya.

Halor kawei pat ka jingkylli, u Samla Donald ula ong “Ngim tip balei ba ka Sorkar ka pynslem ban pyntreikam ia ka ILP hynrei ngi dawa ia ka Sorkar Jylla ba kan buddien khlem shongthait namar ka kam kala dawa ban leh noh mynta bad ha kawei ka sngi kan sa long dier palat. Katba ka Sorkar kam pat pyntreikam ia ka ILP ne kino kino ki lad jingiada ia ka jinglong kyrpang bad ka hok ki trai ri trai muluk, ka KSU kam banse ban shimti ia ka ain hala ka jong ka kti”.

Yn pynkhlain ka KSU ia ki lad pahara ha ki jaka khappud
Ka KSU kala pynjur ia ki jingpyrshang ban iada bad pahara ia ki jaka khappud ka Jylla, khamtam hadien ka jingjia wan thombor ki runar Bangladesh ha South West Khasi Hills.
Kat kum ka jingong u samla Donald, ki dkhot ka KSU kila peit pyrman bha ia ki jaka khappud, kiba pynlong ia ki jingtalasi kali bad ki briew kiba wan rung sha Jylla, bad kila iatreilang bad ki Dorbar Shnong bad ki Rangbah Shnong ban pynithuh ia ki briew kiba iashankhmat ba ki dei na Bangladesh.

Ka KSU kala iatreilang ruh bad ki shipai Border Security Force (BSF) bad ki Pulit ban pynkhlain ia ki jingpahara ha khappud. Hynrei, u samla Donald ula pynpaw ia ka jingsngewkhia halor ka jingtreikam ki Pulit da u pud khlem kano kano ka ain kaba kyrpang ban leh eiei pyrshah ia ki poi ei.

“Ngi la iatreilang ruh bad ki Pulit hynrei la iohi ba ki Pulit kim donbor satia khlem kano kano ka ain ba kin lah ban leh eiei pyrshah ia kito ki briew kiba wan rung beain shapoh ka Jylla” ula ong.

“Watla ki BSF kila peit ia ki jaka khappud, ki briew ki ioh ban rung sha Jylla jong ngi hynrei ki don katto katne ki jaka ha khappud khamtam ha ki thain Pynursla, ka circle jong ngi kala treishitom bha bad kila iashong jingialang bad ki BSF khnang ba ka KSU bad BSF kin iapeitngor lang” ula bynrap.