Nongstoiñ, Nailar 17: Namar ka jingjot rathai jong ka surok na Malangkona sha Langdongdai, ki nongïalam ka Synjuk Nongsynshar Shnong Nongtrai Sepngi ryngkat ki paidbah jong ki 18 shnong ha ka sngi saitjaiñ, ki la mih paidbah ban maramot hi ïa ka surok tang ban lah ban ïaid ki kali na ka bynta ka pang ka shitom bad ka kit ka bah.
Dang ha ki khyndiat bnai, ki nongialam ki la leit ban ïakynduh ïa u Executive Engineer ka PWD ban kyrpad ba ka ophis kan phah maramot ïa katei ka surok hynrei haduh kam don dak satia ba kane ka Ophis kan leh eiei. Namar kane, ki nongïalam ka Synjuk ki la lum ïa ki paitbah na ki khatphra tylli ki shnong kiba don ha katei ka thaiñ ban ïapyrkhat kumno ban shim hi noh ki sien jam tang ban lait na ki jingeh ha ka leit ka wan.
Da ka jingsngewkhia ki nongïalam ka Synjuk ha ka jingshong jingialang dang shen, ki la ïakut ba baroh ki rangbah na kitei ki shnong kin ïamih ban maramot hi ïa katei ka surok bad ki la kyrpad ruh ïa baroh kiba don kali Mahindra pickup ba kin phah ïa ki kali jongki ban leit kit mawria, shyiap bad khyndew ban moramot ïa ka surok.
Ha ka sngi saitjaiñ ba la dep ka 16 tarik Nailar ki paitbah shnong ki la ïamih bad kumba khatsan tylli ki Mahindra pickup ki la poi ban kit maw, shyiap bad khyndew.
Wat hapdeng jong ka jingshit kyrang jong ka sngi ki paitbah ki la minot thop baroh shisngi bad ka jingmaramot ka long tang ïa kito ki jaka ba la sniew palat ba ki kali ki la shem shitom ban ïaid.
U babu Birbor Riangtem uwei na ki nongïalam ka synjuk ryngkat bad ki sordar shnong haba ïakren bad u nongthoh khubor, u la ong ba katei ka surok ka dei kaba la pyntrei da ka PWD naduh u snem 2013 ha ka por ba u Dr. Mukul Sangma u dang long kum u Myntri Rangbah ka jylla, kaba la tip kum ka Malangkona Bamil Road bad ha ka wat kaba nyngkong, la mang ban siang rong tang shiphew kilomitar. Hynrei kaba lyngngoh ka long ba nalor ba ka jingsiang rong ka dei ba mar shu dep siang mawria la shu ber khyndew malu mala bad sa tah pynïong da ka rong.
Nalor kata u la ong ruh ba ka jingshah ñiew beiñ ka long ba ïa ka mang ban siang rong na ka shiphew kilomitar, la pynjah noh shi kilomitar namar katkum ka jingthew jong ki la lap ba ïa ka rong la siang tang khyndai kilomitar.
Halor katei ka jingleh buit poh jong ka sorkar, ki sirdar shnong ryngkat ki paitbah ki la buh jingkylli ba shaei ka sorkar ka pynjah ïa ka pisa jong ka shi kilomitar. Ki nongïalam ka synjuk ki la ong ba kin sa leit ban ïakynduh biang ïa ki heh ka PWD, ban pynkynmaw ba kin pynsngew sha ka sorkar ba kan phah maramot noh kloi katba lah ïa katei ka surok.
Ka dei ka surok kaba donkam eh namar ba dei tang katei ka surok kaba dei u budlum jong ka ïoh ka kot, ka kit ka bah ïa ki mar rep mar riang jong ki, ban shalan sha kiwei pat ki jaka.
Ka ïew kaba jan tam na katei ka thaiñ ka dei ka ïew Kamarimura (Joypur) kaba don ha Malangkona. Ka dei ka ïew kaba baroh ki paitbah nongshong shnong ka thaiñ ki leit ban siew ban tda ban thied tiar thied tar bad kiwei kiwei.
Lada ka sorkar kam leh ei ei halor katei ka jingeh ba ki paitbah ki ïakynduh, kin sa lum lang biang ïa ki paitbah bad kin sa shim ïa ka rai bad kim banse ban ïaid da kiwei pat ki lynti.
