Shillong, Nailar 17 : Ki runar ki bym lah ban tip ki dei kiei, kila wiang ding dusmon ia ka Iingmane ka Khasi Jaintia Presbyetrian kaba don ha ka shnong Pomlahier, Mawryngkneng East Khasi Hills District.
Kat kum ka khubor Pulit, la suba ba kane ka jingjia kala jia ha ka shiteng synnia jong ka 14-15 tarik bad la lap nyngkong ia ka, da ki nongshongshnong.
Ki Pulit ki iathuh ba katto katne ki bynta jong ka Iingmane kila julor na ki thylliej ding kynthup ia ki ben ba shong ki nongleit jingiaseng. Kine ki runar kila thoh jingthoh ruh ha ka kynroh jong ka Iingmane kaba ong “JMR”.
“Ka jingtohkit mynta kala iaid shakhmat ban lap ia ki briew kiba donkti. Haduh mynta ngim pat ioh kem iano iano ruh” ong u Superintendent of Police ka East Khasi Hills Bah Vivek Syiem.
Na ka liang ki nongsharai Balang kila pynpaw ia ka jingbynniaw bad jingsngewsih bad kim pat ruh ban mutdur ba ki riew runar kin wan leh dusmon ia ka jaka kyntang.
La pyntip ba kane ka jingwiang ding ia ka Iingmane ha Pomlahier kala jia teng ruh ha ki snem bala dep hynrei u runar ba donkti, ula phla hi haba kynnoh ba dei uba don ka jingduna ha ka bor pyrkhat.
