Shillong, Nailar 17 : Ka Khasi Students’ Union-South East Central Circle bad ka Federation of Khasi Jaintia & Garo People-Riwar Circle, kila iamih shakhmat ha ka sngi Saitjain ban pynieng ia ki radium retro reflective tape ha shi lynter ka rud surok na Laitlyngkot haduh Mawlieh kaba hap hapoh ka package 2.
Kine ki arseng hapoh ka jingialam u Vice President ka KSU, SECC Bansuklang Khongwar bad President ka FKJGP-Riwar Circle Evanfield Khonglam, kila shim ia kane ka sienjam haba iohi ia ka jingkynnoh khein sting bad leh bym suidniew ka kompani ia ka jinglong shngain bad ka jingsuk ka iaid ka ieng ki paidbah na kane ka surok.
“Ki arseng ki lah iakren lah bunsien bad ki bor ba dei khmih na ka Sorkar bad kumjuh ruh ka kompani kaba pyntrei ia ka surok Shillong-Dawki hynrei man ki sien, ki shu kohnguh tang ka khlieh bad kim pyni dak satia kat kum ka jingkren” ong kine ki nongialam ki arseng.
Namar kata, ki ong ba kim banse ban shim halade ia ka kam ban leit thung iala ki jong ki radium na ka bynta ka jingshngain bad ka jingsuk ki nongleit nongwan ha ka thain Pynursla Sub Division.
Kine ki ar seng kila maham ruh ia ka kompani kaba pyntrei ia ka surok bad ia ka surok ba ki dei katba lah ban pynbeit pynbiang ia ka jinglong shngain ka surok khamtam eh ba kin peit bniah ia ka jingshngain u paidbah la ka long ha ka bynta ka jingtwa khyndew ne ha ka bynta ka jinglong jingman ki rud bad ki kner surok.
“Lada kim shymkhia, ki arseng kin shim da kawei pat ka sien jam kaba kham tyngeh pyrshah ia ka kompani ne ia ka Sorkar”
