Nongstoiñ, Nailar 16: Ka jingrakhe ïa ka sngi Laitluid jong ka Ri India ba 79 ha West Khasi Hills District ka la long ha madan ka St. Peter’s Higher Secondary School Pyndengrei, Nongstoiñ, ha kaba ka Dr. M. Ampareen Lyngdoh Myntri ba dei peit ïa ka Koitka Khiah ka long Kongsan.
Ka Kongsan ka la pynher ïa ka Lama Lai rong jong ka Ri India bad shim ïa ka Rashtriya Salute, hadien ka jingïaid March Past na ki 27 tylli ki kynhun, kaba kynthup ïa 26 tylli ki kynhun skul, ki NCC, Scouts and Guides bad shi kynhun na ka tnad Pulit.
Ha kane ka sngi kyrpang kiba ïadon ryngkat lang bad ka Myntri, ki kynthup ïa u MLA ka Nongstoiñ u Bah Gabriel Wahlang, u Bah Garod L.S.N. Dykes, ÏAS, Deputy Commissioner, u Bah B.D. Marak, Superintendent of Police, u Shri M. Skhemlon, District & Sessions Judge, baroh ki ADC, EAC, ki ophisar sorkar bad kiwei kiba la shah khot sngewbha.
Ha ka jingkren ka Kongsan ka la pynpaw ïa ka jingmut jong ka Sngi Laitluid jong ka Ri India, ka jingïatylli, ka jingieit ri bad ki kam bah ba la leh da ka Sorkar ha ka liang ka koit ka khiah, ka pule puthi, ka surok lem bad kiwei pat ki kam pynroi kiba ki paidbah jong ka jylla ki donkam.
Ha kane ka sngi rakhe, ki 10 tylli ki skul, ki la wan ban ïa shim bynta ha ka jingïakop pyni kolshor kynthup ïa ka jingshad.
La sam ruh ïa ki khusnam sha ki nongjop ha ki jingïalehkai bapher bapher, kynthup ïa ka Best March Past sha ka Sibsingh Memorial Higher Secondary School, Cultural Songs sha ka Public Secondary School, Nongstoiñ, Cultural Dance sha ka Nongstoiñ College, Best Primary Health Centres sha ka Nonglang PHC bad Maweit PHC.
Kum shibynta jong ka Campaign “Har Ghar Tiranga, Har Ghar Swachhata”, ka shnong Ladweitang ka ka ïoh ïa ka khusnam kum ka Shnong kaba khuid tam bad ka Anderson Higher Secondary School kum ka Skul kaba khuid tam hapoh ka District.
La sam ruh ïa ki jingbam sha ki jaka Ri Khunswet kiba don hapoh District, bad ki nongpang kiba don ha Civil Hospital Nongstoiñ.
Ha kane ka sngi la kynmaw burom ruh ïa ka jingjop ha ka liang ka koit ka khiah ha West Khasi Hills District, ha kaba la ai khusnam sha ki jaka ai jingsumar ba trei bha ha ka jingpyntreikam ïa ka Megha Health Insurance Scheme (MHIS) bad ban ïoh ïa ka jingpynshisha (Certification) na ka Ministry of Health & Family Welfare hapoh ka National Quality Assurance Standards (NQAS).
Ka Myntri ka koit ka khiah, ka Dr. Ampareen Lyngdoh, ka la ai khublei kyrpang sha ki doktor, ki nurse, ki ophisar pynïaid bad ki nongtrei kiba la trei shitom ban pynkylla dur ïa ka koit ka khiah ha ka District.
Na ki 11 tylli ki jaka ai jingsumar kiba la pynkhreh na ka bynta ka National Assessment, lai tylli ki la ïoh ka Full NQAS Certification, katba san tylli pat ki la ïoh ïa ka Certification with Conditionality.
Kiba ioh khusnam na West Khasi Hills District ki long ka Mawlangniang SC AAM, Nongstoiñ Block Quality Certified, Kyrdum SC AAM, Mawshynrut Block Quality Certified, Mawthengkut HW CSC, Mawshynrut Block Quality Certified, Sangriang HWC SC, Nongstoiñ Block Quality Certified with Conditionally, Miangshang HWC SC, Nongstoiñ Block Quality Certified with Conditionally, Kyrshai HWC SC, Nongstoiñ Block Quality Certified with Conditionally, Langja HWC SC, Mawshynrut Block Quality Certified with Conditionally, Umsohpieng HWC SC, Mawshynrut Block Quality Certified with Conditionally.
Kine ki khusnam ki pyni shai ba ka District ka la kloi ban pynneh pynsah ïa ka jingbha ha ka jingai jingsumar bad ban kyntiew ïa ka jingkoit jingkhiah jong ki paidbah.
