Rai ka BAC ban pynlong ia ka Dorbar Synrai ha ka taiew ba-ar u bnai Nailur

Shillong, Nailar 13: Ka Business Advisory Committee (BAC) jong ka Iing dorbar thawain ka Jylla Meghalaya ka la shim iaka rai ban pynlong noh iaka dorbar synrai naduh ka 8 haduh ka 12 tarik Nailur 2025.

Ïa kane ka rai la shim ha ka jingïalang jong ka BAC ha ka sngi Balang ha Assembly’s New Conference Room, Khyndailad, kaba la pynïaid da u Lamphang ka Iingdorbar Thaw Ain u Thomas A Sangma.

Ka dorbar ba san sngi kan kynthup 3 sngi Government Business bad 2 sngi Private Members.

Haba kren sha ki lad pathai khubor, u Lamphang u la ong ba ka BAC ka la mynjur da kawei ka sur ia ka por treikam jong ka dorbar synrai.

“Ka jingialang ka la iaid bha bad la wan ban iashim bynta da baroh ki dkhot. Ka Autumn dorbar synrai kan sdang ha ka 8 tarik haduh 12 tarik Nailur, ha kaba lai sngi na ka bynta ki kam Sorkar bad ar sngi na ka bynta ki kam jong ki dkhot shimet” u la ong.

Ha kylli halor ka rai ban sdang ha ka sngi Nyngkong ym ha ka sngi thohdienh, u Lamphang u la batai ba kam dei ka kyndon kaba la buh beit.

“Kam dei kaba la teh kyndon ban pynlong Dorbar sngi Thohdieng namar wat ha ka sngi Thohdieng bad la pynjlan biang shaka sngi Thohdieng namar ka shuti Janmashtami. Mynta u snem, da kaba duna ki Kam Sorkar, khamtam eh ki jingdawa ba la pyndap bad ki jingdawa jingïarap, ka Committee ka la mynjur ïa ka por naduh ka sngi Nyngkong haduh ka Thohdieng” u la pynshai.

Haba kylli hato ki Liangpyrshah kila mynjur ne em iaka rai, u Lamphang ula pynthikna ba baroh ki dkhot, kynthup ïa ka Liang Pyrshah, ki sngewhun ïa ka jingbuh ia ki sngi shong dorbar, da kaba bynrap ba kam shym la don kano kano ka jingpyrshah na kano kano ka liang.

Ha kane ka jingïalang la ïadonlang u Symbud Myntri Rangbah ka Jylla uba khmih iaka tnat Parliamentary Affairs u Bah Prestone Tynsong, u Nongïalam ka Liang Pyrshah u Dr Mukul Sangma (lyngba ka video conference na Tura), ki MLA kynthup u Bah Charles Pyngrope bad u Bah Lahkmen Rymbui, ryngkat ki heh ophisar ka Assembly.