Shillong, Nailar 13 : U Myntri Rangbah ka Jylla Conrad K Sangma ha ka sngi Balang, ula pynbna ia ka rai jong ka Sorkar Jylla ban ai jingkyrshan song pisa sha ki nongshong dukan madan bala dep register ialade, kiba shong dukan ha ki Iew ba don haki jaka sor (urban market) lyngba ka CM Urban Livelihood Grant Scheme (CMULGS).
Ka jingkyrshan song pisa ba shisien ai ba T.10,000 la sam sha ki nongshong dukan madan bala register ialde bad ka Hima Mylliem ha ka prokram bala pynlong ban buh maw nongrim ia ka wat kaba ar jong ka Iewduh Beautification Project.
Haba kren ha ka jingialang, u Conrad ula ong ba ka thong ba hakhmat eh jong ka skhim ka long ban pynioh ia ka burom bad ka jingkyrshan ia ki nongshong dukan madan, haba ai jingithuh ia ka jinglong kongan ka kam ba ki trei ha ka ioh ka kot ki jaka sor.
Da kaba ai jingkyrshan song pisa bad kyntiew ia ka mynsiem ban iakyrshang lang, ka Sorkar ka thmu ban nang pynheh ia ka kamai ka kajih jong kine ki nongshong dukan madan.
“Kam dei satia tang shaphang ka pisa ne tang ka skhim kaba ngi ai, nga sngew ba ka khubor ba kham khraw ka dei ka burom. Ka dei halor ka jingshisha ba ka Sorkar ka kwah iathuh ha phi ba kaei kaei kaba phi leh ka long kaei kaei kaba kongsan bha. Kaei kaba phi leh mynta ka dei kaba phi kamai jakpoh na ka bynta ka iing ka sem bad ka burom jong phi ka don hangne. Ka khubor ka long ba ka Sorkar ka iadon ryngkat bad phi bad kan kyrshan ia phi kat kaba ka lah khang ban nang lah kyntiew ia ka ioh ka kot jong phi” ong u Myntri Rangbah.
U Conrad ula pynbna ruh ba ka Sorkar Jylla ka don jingthmu ban pyniar ia ka lyngkha treikam jong kane ka prokram sha kiwei ki iew kiba don ha ki jaka sor jong ka Jylla.
“Suki suki katba ngi dang jam shakhmat, ngin sa pynrung lang ia kane ka skhim sha ki iew kiba don ha ki jaka sor. Kane ka long ia baroh ki jaka municipal kiba don ha Jylla. Kat haba don ki jaka iew, ka jingthmu jong ngi ka long ban iarap ia ki nongshong duan madan bad kyrshan ia ki da ki song pisa lane kano kano kaba ka Sorkar ka lah” ula ong.
Kat kum ka jingong jong u, ia kane ka jingiarap song pisa yn sap hah beit beit sha ki bank account jong ki nongshong dukan madan khnang ban pynthikna ia ka jingtreikam kaba shai bad kaba treikam bha.
Ula ong ba ki nongshong dukan madan ki bym pat dep register, kilah ban leit register noh khnang ba kin ioh ia kane ka skhim haba kular ba kane ka jingregister kam dei satia kaba thmu ban tehkyndon ia ki Iew hynrei ban wanrah ia ka rukom treikam ban lah pyniaid bha ia ki iew.
 lyngba ka CM Urban Livelihood Grant Scheme (CMULGS).){kind=link}