“Kumno ka jingtohkit ka iaid ban lapdien ia ka jingdonkti u Bah Cherist”
Shillong, Nailur 09: Ka Tnad Meghalaya Police kala pynthikna ba dei u General Secretary bala wan pyndem wait jong ka kynhun Hynniewtrep National Liberation Council (HNLC) Bah Cheristerfield Thangkhiew, uba phah ban pynbthei bomb IED ha kylleng ki jaka ka Jylla bad ba dawa pisa ruh na ki Hehspah kynthup wat na ki Heh Sorkar.
Ia kane la pyntip da ka Tnad Pulit hakhmat ka Inquiry Commission jong u Justice T Vaiphei kaba tohkit ia ka jingshah siat iap une u Nongialam barim ka HNLC ha ka step 13 tarik Nailar 2021 ha ka Iingsah jong u ha Mawlai Kynton Massar.
Kat kum ka kaiphod jingtohkit u Justice Vaiphei kaba la wanrah da u Myntri Rangbah ka Jylla Conrad Kongkal Sangma hapoh ka Dorbar Synrai jong ka Iingdorbar Thaw Ain ka Jylla hynne ka sngi thohdieng, ka Tnad ka pyntip ba u Bah Cherist ula leh ia kitei ki kam pyntriem ha ka kyrteng thok ba ula ai dalade kum u Sanbor Pala.
Ka Tnad ka pyntip ba hapdeng u snem 2020 haduh 2021, haduh lai tylli ki jingpynbthei bomb IED kila jia ha Jylla bala donkti da ka HNLC ba kynthup ia kawei ha Iew Sookilo kaba jia ha ka 26 tarik Naiwieng 2020, ka jingpynbthei bomb ha Star Cement ba jia ha ka 12 tarik Rymphang 2020 bad ka jingbuh bomb ba khlem bthei ha Meghalaya Coke factory kaba jia ha ka 17 tarik Kyllalyngkot 2021.
Ka pyntip ruh ba ha ka jingpynbthei bomb ha Sookilo, ki Pulit kila ioh kem ia arngut ki briew ba donkti kiba la phla ba la phah bad ai pisa ia ki da u Sanbor Pala.
Ka iathuh ba ha ka miet 13-14 tarik Naitung 2021, ka HNLC kala pynbthei biang ia u bomb IED ha ka Police Reserve ha Khliehriat ba pynmynsaw ia arngut ki Pulit bad ha kane ka jingjia ruh, ki Pulit kila kem haduh 12 ngut ki briew kiba la pynmih biang ia ka kyrteng u Sanbor Pala.
Ka Tnad Pulit ka pyntip ba ha ka 10 tarik Nailar 2021, ka jingbthei bomb IED kala jia ha Iew Laitumkhrah bala kam donkti ha ka HNLC bad ha kane ka jingjia ruh, arngut ki briew kila mynsaw.
La pyntip ba dei hadien ka jingpynbthei bomb kaba jia ha ka 14 tarik Naitung 2021 ha Khliehriat, ka Tnad Pulit kala thaw iaka Special Investigation Team (SIT) ban tohkit bniah ia kine ki jingjia bad ban lapdien ia u Sanbor Pala uba ju tyrwa pisa sha kine ki briew ba shah kem ban shna ban pynbthei ia u bomb IED ha kat ki jaka ba u phah.
Kine ki briew kila phla ruh ba u Sanbor Pala u ju kren ia kine ki briew da ka phone bala pyndonkam da u nombor na Bangladesh.
La pyntip ba ka SIT kala tih jylliew ban pynithuh ia u Sanbor Pala bad hadien ka jingtohkit kaba bniah bha kala lapdien ia uwei u briew. Ka kynhun kala buddien ia une u briew kaba lam sha ka jingioh kurup ia bun ki phone ba ju iakren bad ki briew ka HNLC, kaba pynlong ruh ia ki Pulit ban ioh kurup ia kawei ka kali kaba ju pyndonkam ban kit ia ki bomb IED.
Ka SIT da ka jingai jingtip ki briew ba shah kem bad ha ka jingiabuddien, la shem ba u don uwei u briew uba la shah bthah ban iakynduh ia uwei pat u briew bym ithuh ha ka 17 tarik Naitung 2021 ban shim ia u bomb IED bad ka pisa.
Ka kynhun kala buddien ia une u briew bad lap ba ula leit iakynduh ia une u briew bym ithuh (ba deng mask) ha Motphran bad shim ruh ia kawei ka song. Ki pyntip ba mar mar kila pynapshrip ia une u briew ha Mawryngkeng bad kila ioh ban kem ia u ha ryngkat bad ka song pisa ba T. 60,000.
Ka SIT haba buddien ia une u briew bym lah ban ithuh uba deng mask, kala shimti noh ia ki video CCTV na ki thain Motphran ban tohkit bad ha ka jingtohkit, la shem ba une u briew ba ai ia ka song pisa, u dei uba iasyriem bad u Bah Cheristerfield Thangkhiew.
Ha kajuh ka por ban pynthikna ia ka jingdonbynta u Bah Cherist, ka kynhun SIT kala pan ia ka Call Detailed Report (CDR) jong u Bah Cherist jong kajuh ka por bad ka sngi ba shim pisa utei u briew na Motphran bad ha ka jingtohkit la lap ba u Bah Cherist ula don ha Motphran ha kane kajuh ka sngi bad ka por.
Namar ka jingdeng mask, ka SIT kala pan ia ka Internet protocol Detailed Report (IPDR) kaba la nang pynthikna ba dei u Bah Cherist uba ai ia ka song pisa ha une u briew ba shah kem.
Ka SIT haba nyngkong ka dang pynman ba u Bah Cherist u dei tang u nongiarap ia u Sanbor Pala bad kumta la sngew donkam ban hap kem ia u ban khanglad iaka jingiai jia ki kam pyntriem.
Ka SIT ka pyntip ruh ba katba ka jingtohkit ia kane ka kam pynbthei bomb ka dang iaid shakhmat, kala mih ruh sa ka jingdawa pisa kaba jur naka HNLC hapdeng u bnai Naitung haduh Nailar 2021 bad ka jingphah shithi dawa pisa sha ki Heh Spah bad ki Heh Sorkar
Kumban shu pynkynmaw, kila don bun ngut ki Myntri Sorkar, ki MLA bad wat ki MDC ka ri-lum Khasi Jaintia, kiba la ioh pdiang ia ki shithi dawa pisa na ka HNLC hapdeng kitei ki bnai.
Ka ong ba ha ka jingtohkit ia kine ki shithi dawa pisa, ki jingdawa pisa, ki ejahar ba ioh pdiang, kila ioh ia ka sakhi ha ki sdang taiew jong u Nailar ba suba jur ba dei u Bah Cherist u dei uba treikam ha ka kyrteng jong u Sanbor Pala bad ula dawa pisa ban theh pisa sha ki kam pyntiem jong ka HNLC lyngba ki kam pynbthei bomb IED bad kiwei kiwei.
Ka SIT ka pyntip ba ki Pulit kila iohpdiang ia shibun ki ejahar halor ka jingphah shithi dawa pisa u Sanbor Pala sha ki briew ia kaba la register case ha Sadar Police Station, Rynjah Police Station bad Mawlai Police Station.
Ka SIT ka pyntip ba ka jingioh kyndang ia ki briew ba donkti ha kine ki kam dawa pisa kala mih lyngba ka jingujor jong uwei u briew (bala buhrieh kyrteng da ki Pulit) uba la aiti ruh ia ka audio record (record ia jingkren u nongdawa pisa) kum ka sakhi bad ha ka jingphah bishar ia ka sur u nongdawa pisa sha ka Forensic Lab bad phah ianujor ruh ia ka sur u Bah Cherist bala shim na ki video bapher bapher, la pynthikna ba u nongdawa pisa u dei u Bah Cherist bad ula treikam ha ka kyrteng u Sanbor Pala.
Ka SIT ka ong ba hadien ka jingjia pynbthei bomb ha Laitumkhrah ba jia ha ka 10 tarik Nailar 2021, ka Tnad Pulit kala ioh ia ka khubor ba thikna ha ka 11 tarik Nailar 2021 bad 12 tarik Nailar 2021 ba ka lah ban don biang ka jingpynbhei bomb IED ha Them Metor, Secretariat bad Police Bazaar.
Kane ka jingdon ka don khamtam haba ka kynhun tohkit halor ka jingbthei bomb ha Khliehriat kala lap ba ki dang don ki bomb IED bad ki dkhot ka HNLC kaba lah ban lam shawei pat ka jingpynbthei bomb.
Ka pyntip ba dei halor kine kiei kiei baroh, u DGP ka Jylla ula lum ia ka high level meeting jong ki Heh Pulit hapoh headquarter kynthup ki Ophisar ba tohkit ia ki jingjia bthei bomb, ha kaba une u khliehduh ka Tnad ula bthah ban kem noh ia u Bah Cherist khnang ban tehlakam ia ki jingjia pynbthei bomb ba thmu da ka HNLC.
Ka Inquiry Commission u Justice Vaiphei kala pynksan ia ka rai jong ki Pulit ban kem ia u Bah Cherist haba pynshong nongrim kat kum ki sakhi satar hynrei kala pynsngew pat ba ka jingleit khynra jong ki Pulit ka dei kaba la shu leh lymmuh, khlem da pyrkhat bad ba la shu pyndonkam kput ia ka bor kaba lam sha ka jingiap jong une u Nongialam barim ka HNLC.
