Kohima, Nailur 09 :Ka sorkar pdeng kala pynjlan biang ia ka jingsangeh iasiat bad ka kynhun seng lehnoh Niki Sumi kaba ia pait na ka NSCN sa na ka bynta shi snem kynthih.
Lah ban kdew ba ka NIA kala pynbna ia ka khusnam kaba T.10 lak na ka bynta u Niki Sumi uba la lamkhmat ia ka kynhun Niki group jong ka NSCN halor ka jingkynnoh donkti ha kaba thombor ia ka kali ki shipai India kaba la shim ia ka jingim jong ki 18 ngut ki shipai ha Chandel hapoh Manipur ha ka snem 2015.
Kane ka tnat jong ka NSCN kala don hapdeng ka jingsangeh iasiat bad ka sorkar pdeng naduh u bnai Nailur 2021.
“Ia ka jingmynjur halor kane ka jingiateh sangeh iasiat hapdeng ka sorkar India bad ka kynhun seng lehnoh National Socialist Council of Nagaland (K) Niki group la pynjlan biang sa na ka bynta shi snem kynthih, kata naduh ak 8 tarik mynta u bnai haduh ka 7 tarik u Nailur 2023,” ong ka jingthoh na ka tnat MHA.
Na ka liang ka sorkar pdeng kala pynlong ia ka jingiakren iasuk bad kane ka kynhun kaba mih na ka NSCN, kata nalor ka seng NSCN-IM hadien ba kila rung sha ka jingiamynjur ban pynjari sangeh iasiat.
Ki kynhun kieng atiar kiba la poi sha ka jingiateh sangeh iasiat ki kynthup ia ka NSCN-NK, NSCN-R, NSCN K-Khango bad ka NSCN (K) Niki.
