Shillong, Nailar 08: U Chief Secretary ka Jylla Bah DP Wahlang u la ong ba ka jingbishar bniah bad ka jinglum kyllum ia ki jingai jingmut jong ka Expert Committee halor ka State Job Reservation ka dang iaid mynta.
Haba kren shaki lad pathai khubor u Bah DP Wahlang ula ong ba kum u Chief Secretary u kut jingmut ban pyndep ïa ka jingbishar bniah bad ban lum kyllum iaki jingai jingmut jong ka Expert Committee hashuwa ban aiti iaka kaiphod shaka Sorkar Jylla ha ka 31 tarik Nailar.
“Nga hap ban lum lang ia ki jingai jingmut jong ka Committee bad kane ka kam ka dang iaid shakhmat bad kumba la bthah da ka Kynhun Myntri Sorkar ia nga ban aiti ia ka kaiphod haduh ka 31 tarik Nailar, ngan sa pyndep ia kane ka kam haka por bala buh” ula ong.
Ka Committee ba la khlieh da u Justice (Retd) MC Garg, kaba la thaw ha ka 12 tarik Nailur, 2023, ka kynthup Justice (Retd) Dr Satish Chandra, Prof DV Kumar, Prof Chander Shekhar bad Prof Subhadip Mukherjee.
Kane ka Committee ka la aiti ia ka kaiphod jong ka hadien ba ka la bishar bniah ia ka State Reservation Policy kaba la don lypa da kaba lum ia ki jingai jingmut na ki nongshim bynta bapher bapher.
