Dei ka Sorkar Congress u Dr Mukul ba pyntroin ia ka GHADC, kynnoh kylla u Conrad

Shillong, Nailar7: U Myntri Rangbah ka Jylla Conrad K Sangma ula kyntait ia ka jingkam jong ka Liang Pyrshah ba ka Sorkar kaba mynta kala pyntroiñ ia ka Garo Hills Autonomous District Council (GHADC), hynrei ula ong, ba ki kam jong ka jingpyntroin kila sdang ha ka por jong ka seng Congress kaba ialam ia ka jylla da u Dr Mukul Sangma.

Hynrei dei ka sorkar kaba ialam da ka seng National People’s Party (NPP) kaba la shim ia ki rai kiba tyngeh ban wanrah ia ka jingpyrkhing ia ka rukom pyndonkam ki Council ia ka pisa pilain.

Ha kaba iadei bad ka jingkynnoh u Nongialam ka Liang Pyrshah u Mukul Sangma, na ka liang u Conrad haba iakren bad ki nongthoh khubor ha ka nsgi Palei ula ong, ba ka GHADC kala don palat ia 2000 ngut ki nongtrei ha ka por ba ka NPP kala shim ia u lakam synshar, kaba la long palat ia ka jingdon ki nongtrei ha kiwei pat ki District Council ka jylla (KHADC ka don tang 600 ngut ki nongtrei bad ka JHADC ka don 1800 ngut ki nongtrei).

Ula ong ba ki sorkar kiba rim kila thungkam khlem ki Sanction Post ne Service Rules, kaba la lam sha ka jingthung ia bun ngut ki nongtrei snaïap (Ghost Employees).

U Conrad ula kam ba ka jinglut jingsep ha ka jingsiew ia ka tulop ha GHADC ka long T.6-7 Klur katba ka jingpynmih ia ka khajna ha ka shi bnai ka long tang T.1-2 Klur, kumta kala pynmih ia ka jingduna ka pisa haduh T.5 Klur.

“Kumta kane ka jingsdang ia ka jingpyntroin, kaba u Nongialam ka Liang Pyrshah u kren kala sdang ha ka por ka jongu” ula ong.

U Myntri Rangbah ula ong ba kane ka sorkar kaba mynta kala shim ia ki sienjam ban wanrah ia ki jingkylla ha ka Council, kaba kynthup ia ka jingpynduh kam noh ia ki nongtrei snaiap bad ban ym thungkam thymmai shuh bad kala pynduna ia ka jingdon ki nongtrei sha ka 1300 ngut.

“Nga sngewkmen ban pyntip ba na ki 2000 ngut ki nongtrei, mynta kila don sa kumba 1300 ngut ki nongtrei ha GHADC bad ka daw ka long ba ngi lah khmih ia ka thup kyrteng baroh kawei, kila don bun bah ki kyrteng jongki nongtrei snaïap, ngi lah weng noh ia kitei ki kyrteng bad ngim shym la thung ruh wat tang uwei u briew naduh katei ka sngi ba ngi lah shimti haduh mynta namar ba ngi la sngewthuh ba ka long kaba eh ban pyniaid ia ka kam bad mynta ngi la lah suki suki ban tehlakam” ula ong bad ka bynrap “Kine kidei kita ki kami a kaba bun ki briew kim don jingtiop eiei hynrei ngi lah shim ia ka rai kaba tyngeh. Phi tip ka long kaba eh bha bad kane kadei namar ba ki don ka jingkhmih lynti, ki briew ki khmih lynti ba ngin thungkam ia ki ha ki kam kiba lait, hynrei balei ngim shym la thungkam ia ki briew namar ngi lah iohi ba ia kitei ki post kiba la kdew kidei ki bym shim la leh ha ka lynti kaba iaid katkum ka aiñ”.

“Kane kadei kaei kaei kaba la jia ha ka Council bad lada mano mano ruh kiba hap ban shah kynnoh halor kane, ki dei kiba rim kiba bat ia u lakam synshar, ia kaba nga ong, ki briew kila shah thung kam ha ka liang kamon, kadiang bad hapdeng khlem ka dei ia ka jingpynmih ia ka khajna, khlem da peit ia ka bhah tyngka bad kaba kham kongsan kadei ka jingbym bud ryntih ia ki Rules bad ki kyndon treikam” ula ong.

Nalor kane, u Myntri Rangbah ula ong ba kam shym la don kano kano ka jingpyndonkam bakla ia ka pisa kaba T.100 Klur kaba la bhah ia ka GHADC.

Ula pynthikna bai a katei ka bhah tyngka la pyndonkam ha ka lynti kaba khuid bad kaba shai kdar bad katto katne kala leit sha ka bynta ban siew ia ka tulop.

U Conrad ula kam ruh ba ka jingpyndonkam ia ka pisa kadei kaba la buh ha ki jingthoh, ha kaba 75-80% jong ka bhah tyngka la pyndonkam ha kaban siew ia ka tulop.

“Katei ka bhah tyngka kala iarap ha kaban siew 25-28 bnai ka tulop, ia kaba la pynsahteng da ka sorkar kaba rim” ula ong bad ka pynthikna ba kane ka sorkar kaba mynta ka dang trei ha kaban pynbha ia ka jinglong jingman bad ban pynbeit ia ka jingsahteng ha kaban siew ia ka tulop kaba dang sah.