Imphal, Nailur 09 : Ki bor pulit na ka tnat bomb squad kila lah ban khanglad halor ka jingjia kaba triem kaba lah ban wan jia hadien ba kila pynduh noh ia u bom IED ba khlainbor ia uba la buh hakhmat ka ophis jong ka seng BJP ha ka nongbah Imphal ka Manipur.
Ka jingthmu lyngba kane ka jingpynap bom ka long pyrshah ia ka ophis jong ka ward committee ka BJP hapoh ward 16 kaba hapoh Singjamei assembly constituency ka Manipur.Une u bom la iathuh u don ia ka jingkhia kaba haduh kumba 4 kilo.
Na ka liang ki pulit ka tnat Bomb disposal squad ka Manipur kila wan poi mardor ha katei ka jaka bad pynduh noh ia une u bom IED.
Ia katei ka jaka baroh kawei la kerkut da ki bor pahara bad la khang ruh shipor ha kaba iadei bad ka jingwan rung jong ki kali sha kane ka jaka khnang ban pynthikna ba kan ym buh jingma ia ki paidbah.
Ki bor pulit ka Manipur kila pynpaw ba ia mynta hi kim pat lah ban don ia ki briew kiba donkti ha kane ka jingpynap bom bad ka jingtohkit mynta kala iaid shakhmat.
