Ka Sorkar Pdeng kadei ban jubab shai kdar, la kan ai ne ym ai ILP ia ka jylla, ong u Bah Prestone

Shillong Nailar 01: U Symbud Myntri Rangbah ka Jylla u Bah Prestone Tynsong hynne ka sngi Thohdieng ula ong, ba ka por kala dei ia ka sorkar pdeng ban jubab shai kdar, la kan mynjur ne kam mynjur ia ka Resolution kaba la mynjur da ka iingdorbar thawain ka jylla ban pyntreikam ia ka Inner Line Permit (ILP) bad ban kynthup noh ia ka ktien Khasi bad Garo ha ka Eighth Schedule jong ka riti synshar ka ri India.

Haba iakren bad ki nongthoh khubor, u Bah Prestone ula kyntait ia ka jingkynnoh u Nongialam ka Liang Pyrshah u Dr Mukul Sangma ha kaba iadei bad katei ka mat.

U Bah Prestone ula ong ba ka sorkar jylla kala shimkhia bha ia ka mat jong ka ILP bad ka sorkar pdeng, ha kaba u Myntri Rangbah ka jylla u Conrad K Sangma u leit ban iakynduh man la ka por ia u Myntri Rangbahduh ka ri u Narendra Modi bad ia u Myntri Kam Pohiing ka ri u Amit Shah ban pynbor ban ioh noh ia ka jingpyntreikam.

Ka sorkar kala iai buddien ia kane ka mat bad ka Ministry of Home Affairs (MHA) ban mynjur noh ia ka Resolution kaba la mynjur da ka iing dorbar thawain ka jylla.

U Bah Tynsong ula phla ba ka sorkar jylla ka la iakynduh ia ka sorkar pdeng ym duna ia ka 10-15 sien ha ka shi snem bad ka sorkar pdeng kala pynthikna ba ka dang khmih bniah ia ka mat kaba iadei bad ka ILP.

“Haba ngi iakynduh ia ki, nga ong ha phi, nga tharai ba ym duna ia ka 10-15 sien ha ka shi snem bad haduh mynta haba ngi iakynduh (sorkar pdeng) ki ong ba ngi dang khmih ia ki mat kiba kynthup ia ka ILP bad ban pynrung ia ka ktien Khasi bad Garo. Hynrei ngi iai pynkynmaw ia ki bad ngi iai buddien beit bad ki” ula ong.

“Nga thikna ba ha kawei ka sngi, ia kane ka mat yn hap ban pyntip, lada kim ai kidei ban kren da kaba shai ba kim ai ne lada ki ai, sngewbha ong ia ngi hooid, ba ngin sa ai ia baroh artylli ki Resolution. Kawei kaba nga kwah ban kren ka long ba na ka liang jong ka sorkar kam dei ba ngi thok, kam dei ruh ba ngi iohthiah hynrei ngi la shimkhia thikna ia kane ka mat” ong u Bah Prestone Tynsong ryngkat bad ka pynpaw ia ka jingkyrmen ba ka sorkar pdeng kan sa ai ia ka jubab kaba shai kdar halor kane ka mat la kan long kaba bha ne sniew.

U Bah Tynsong ula ban biang ba ka sorkar kaba mynta ka kular ban buddien thikna ia ka mat jong ka ILP kaba long pyrshah ia ka jingkam jong u Dr Mukul Sangma.

Ha kaba iadei bad ka jingkylli, u Bah Prestone ula ong ba kam shym la don kano kano ka jingbuh kyndon da kawei pat ka lad kaba la pdiang da ka sorkar bad ia ka mat jongka ILP kadei kaba la shimkhia thikna tang kum kawei ka mat kaba iapher na ka Sixth Schedule.

“Kam shym la don kano kano ka jingphah jied da ka Sorkar India. Ngim shym la ioh ia kum katei ka lad namar ba ka Sixth Schedule kadei da kawei pat ka mat katba ka ILP pat kadei da kawei pat ka mat” ula ong.