Shillong, Naitung 31: Ka Confederation of Meghalaya Social Organization (COMSO) Jaintia Region hynne ka sngi Palei, kala leit aiti ia ka dorkhas ha u Deputy Commissioner jong ka East Jaintia Hills District u Shivansh Avasthi ban dawa ba dei ban pynlong ia ka jingkhynra pyrshah ia ki mynder ri kiba wan ban rung be-aiñ shapoh ka thain.
U Vice Chairman ka COMSO u Bah Sambormi Lyngdoh ula ong, ba ka daw kaba la pynlong ban dawa ia katei, kadei namar ba ka jylla Assam kala pynlong ia ka jingkyndang ia ki mynder ri bad kala mana tyngeh ia ki bym dei ki nong India ba kin shong buhai shnong hapoh u pud u sam jong katei ka jylla. Ka seng ka don ia ka jingsheptieng ba kitei ki briew kiba la shah beh ki lah ban wan rung ban shong buhai shnong hapoh East Jaintia Hills bad kumta kala kyntu ia ka ophis treikam jongu DC ban shimkhia mardor ban leh eiei ban tehlakam ia katei.
Ula pyntip, ba na ka liang jong u Deputy Commissioner ula pynpaw ia ka jingkloi ban iatreilang bad ka COMSO ban tehlakam ia ka jingwan rungtuh jongki briew kiba nabar ri bad ula don ruh ia ka jingthmu ban lum ia ka jingialang bad ki Waheh Shnong jongka East Jaintia Hills bad ki ophisar sorkar ban wad ia ki lad ki lynti ban tehlakam ia ka jingwan rungtuh ki mynder ri bad ruh ban pynlong ia ka jingkhynra ha ki shnong ki thaw kaba kitei ki mynder ri kila rieh.
“Watla ka Ministry of Home Affairs jong ka Sorkar India kala ai ka jingbthah ia ki jylla, hynrei u DC jongka East Jaintia Hills ula ong ba ym shim la ioh ia kano kano ka jingbthah na ka sorkar jylla ha kaba iadei bad ka jingthaw ia ka Special Task Force (STF) ha ka district, la ong u Bah Sambormi Lyngdoh.
