Shillong, Naitung 30 : Ka Meghalaya High Court ka la bthah ia u Advocate General ka Jylla bad ia u nongiasaid ain jong u nongmudui ba kin leit jngoh ia ki jaka ba marjan jong ka Shillong Peak Ropeway Cable Car Project ban bishar ia ka jinglah ban pynlong ia ka jingthung dieng biang ha kane ka jaka.
Kane ka jingbthah ka Iingkashari kala mih ha ka jingshong bishar ia ka Public Interest Litigation (PIL) bala mudui da u Bah Gerandine G Shabong, pyrshah ia ka jingpom dieng pathar bad pynkhyllem ia bun bah ki dieng ha ka thain Lawsohtun, East Khasi Hills District.
Ka Sorkar Jylla kala kam ba ka jingpom dieng ka dei kaba la leh hadien ka jingioh ia ki jingbit na ka Sorkar Pdeng kaba la iaid kat kum ka ain bad ki rule.
U Nongiasaid ain u nongmudui ula iasaid ba ka dei ka kamram jong ka Sorkar Jylla ba thung thymmai ia ki dieng haba pom ia ki dieng ha kino kino ki jaka hynrei la slem pat ba ka jingthung dieng thymmai ha Meghalaya ka dei kaba duna eh hapoh ka Ri.
La pyntip sha ka Iingkashari ba ka Sorkar Jylla kala pynkhreh ban pynsdang ia ka jingpom dieng, hynrei ka jingeh kala mih haba iadei bad ka jingioh ia ka jaka ha katei ka jaka ba thmu ban shna ia ka project.
“Halor ki jingai jingmut jong ki nongiasaid ain ki liang mamla, ngi kyntu ia u Advocate General bad u Paul ba kin pynbeit ia ka sngi kaba ki lait, ban leit jurup ia ka jaka bad sa aiti ia ka kaiphod ba lyngkot sha ka Iingkashari haba iadei bad ka jinglah ban thungdieng thymmai ha sawdong jong ka Ropeway Cable Car Project” ong ka Iingkashari ba kynthup ia u Justice IP Mukerji bad Justice W Diengdoh ha ka hukum ba pynmih ha ka sngi Balang.
“La bthah ia ka Sorkar Jylla ba kan pynkhreh ia baroh ki jingdonkam ha ka leit ka wan bad ka jingpynlut por jong ki ha katei ka jaka, ka jingbam step bad ka sha ka dud hapoh ka guest house ka Sorkar lane kino kino ki jaka bam ba don marjan ka thain” kala bynrap.
Ia kane ka PIL la buh ban sa shong bishar biang ha ka 14 tarik Nailar, 2025.
