Shillong, Naitung 28 : Ka Seng Samla Lyngiong Pyllun, ha ka sngi Nyngkong, kala leit ban pynsangeh ia ka jingshna pandal ka Yatra Organising Committee, hapoh ka Hima Lyngiong, ban pynkhreh ia ka jingiaid Yatra (pilgrim) ki riewngeit Hindu sha Krem Mawjymbuin, Mawsynram.
Ia kane ka pandal la shna ha madan Phanniewlah Neng, jong ka Hima Lyngiong.
Lah ban kdew hangne, ki riewngeit Hindu, kila shna ia kane ka pandal kum ka jingpynkhreh ia ka jingiaid Yatra sha Krem Mawjymbuin, Mawsynram, ha ka 2 tarik u Nailar.
Kane ka jingpynkhreh kala wan jia hadien ba ka Iingkashari Meghalaya High Court kala pynmih ia ka hukum ha ka 12 tarik Naitung, ba ai jingbit ban pynlong ia ka jingiaid Yatra sha Krem Mawjymbuin hapoh ka jingkhmih jong ki bor District bad ki kyndon jingbthah.
Ka Iingkashari kala hukum ba ki nongiaid Yatra kim dei satia ban leh ia kano kano ka puja ne jinglehniam hapoh ka krem Mawjymbuin bad kim dei ruh ban rah ia kino kino ki tiar na ka bynta katei ka jingthmu. La ailad ia ki nongiaid Yatra ba kin shu synreit tang da ka um ha u maw Shivling uba don hapoh ka krem, ym kiwei kiwei ki jinglehniam.
Ka Seng Samla Lyngiong Pyllun haba iohi ia ka jingieng jong ka pandal ha madan Phaniewlah Neng, kala leit ban tohkit bad shem ba ia kane ka pandal la shna da ki nongpyniaid ia ka Yatra.
Ka Seng Samla kala lap ruh ba kine ki nongshna pandal kila shna ia kane ka pandal khlem da ioh ia ka jingbit na ka Shnong bad wat na ka Hima, kaba pynbor ia ka seng ban pynsangeh shuwa ia baroh ki kam ba iadei bad kane ka pandal.
Kine ki Nongpyniaid Yatra kila dep pan ia ka jingbit da ka jingthoh na ka Shnong bad ka Hima hynrei haduh mynne, kim pat ioh satia ia kano kano ka jubab da ka jingthoh hynrei tang da ka jingbit bala ai da ka ktien na u Rangbah Shnong.
Ki Nongialam ka Seng Samla kila pynpaw ba kim don jingpyrshah satia ia ka jingiaid Yatra hynrei ki pyrshah tang ia ka jingwan shna ia ka pandal kaba la leh khlem da ioh jingbit bad iaid da ka lynti kaba dei.
 ki riewngeit Hindu sha Krem Mawjymbuin, Mawsynram.){kind=link}