Shillong, Nailur 08: Ka Hynniewtrep Integrated Territorial Organisation (HITO) hynne ka sngi palei kala iakynduh ia u President ka Bharatiya Janata Party (BJP) Bah Ernest Mawrie bad dawa ban phah tohkit ha ka Enforcement Directorate (ED) bad ka Central Bureau of Investigation (CBI) ia ki jingkynnoh bamsap hapoh ka Jylla.
Ka HITO kala sei ruh iaka thup jong ki jingkynnoh kam jyrsieh (scam) ba kynthup ia ka kam khaii dewiong, ka kam thung nonghikai, ka jingsam khaw ka Tnad Social Welfare. Ka Soubhagya Scheme, ka jingtei ia ka ISBT, ka jingtei ia ka Iingdorbar Thaw ain ka Jylla, ki kam bamsap ha ki Autonomous District Council, ka Smart Meter,Smart City bad ka jingthied kali ki Pulit.
U President ka HITO Bah Donbok Dkhar ula ong ba nalor kane ka thup, kiwei pat ki kam jyrsieh ki dei ka jingkhang ia ka jingtih dewiong thliew khnai, ka jingpyniap ia u Pulit Inspector bad ka jingpyniap ia u President ka JYF ba jia ha u snem 2014 lem bad ka jingshoh dusmon ia ka Nongtrei sengbhalang ha u snem 2018, ka jingkhaii tuh ia u dewiong bad ki karkhana coke.
“Kine ki dei baroh ki thup kiba ka HITO kala pynkhreh bad ngi shaniah ha kane ka Party (BJP) bad ki Nongialam ba kin wanrah ia ka jingbishar ba hok bad ba ka Meghalaya kan lait noh na ki kam bamsap” ula ong.
Ha kane ka jingiakynduh, u Bah Donbok ula pyntip ba u President ka BJP ula ai ka jingkular ba un sa phah ia ka dorkhas jong ka seng sha u Myntri kam Pohiing ka Ri u Amit Shah. Ula pyntip ba u President ka BJP ula kular ruh ba lada donkam, ka kynhun na ka Party kan sa leit ban iakynduh ia u Myntri kam Pohiing ka Ri ha Delhi.
