Itanagar, Nailur 08 :Ka sorkar Arunachal Pradesh kala rai ban khein iap noh ia baroh ki syrnot Scheduled Tribe kiba la ai sha ki khun ki kti jong ki kynthei trai shnong kiba iathoh shongkurim bad ki bar jylla, kata hadien ba la bishar bniah ia ka kam jong ki da ka committee ba kyrpang, ong u myntri hapoh ka Iingdorbar haka sngi ba Ar.
Haba jubab ia ka jingkylli da u MLA u Lombo Tayeng, na ka liang u Myntri ka tnat Social Justice, Empowerment, and Tribal Affairs (SJETA) u Alo Libang ula ong ba na ka liang ka sorkar kala pyntip ha ka 1 tarik Nailar halor ka jingpynmih ia ki jingbthah kiba iadei bad ka jingai syrnot ST ha ka jylla, kaba kdew halor ka jingpynkut, ka jingbishar bniah bad ka jingpynduh pyndam noh ia ka jingai syrnot ST sha kito ki bym dei hok ban ioh.
Katkum kine ki kyndon jingbthah, lada ki bor sorkar ki ioh ia ki kot ki sla bala pyndonkam da ki jingtip ki bym shisha lane da kaba ialam bakla halor ki jingshisha, lane ka jingleh thok ia ki kot ki sla lah ban pynkut, ban bishar bniah ne ban pynduh shisyndon ia kane ka jingai syrnot ST, ong u Libang.
Haduh mynta ki don khyndai tylli ki case kiba don hapdeng ka kynrum kynram ha ka ba iadei bad ka jingai ia ki syrnot ST ia kaba la rah sha ka committee ba kan bishar bniah.
Kane ka mat kaba iadei bad ka jingai syrnot ST kala pynkhihwin ia ka jylla ha kaba bun bah ki kynhun seng, kiba kynthup ia ka All Arunachal Pradesh Students’ Union (AAPSU) kila pynlong ia ki jingiakhih ha ki bynta bapher bapher ka jylla.
