Pan jubab ka Iingkashari na u AG halor ka mukotduma ba tynjuh ia ka Khasi Lineage Act

Shillong, Naitung 23 : Ka Iingkashari Meghalaya High Court kala pan ia ka jubab na u Advocate General ka Jylla halor ka mukotduma Public Interest Litigation (PIL) ba tynjuh pyrshah ia ki kyndon ka Khasi Autonomous District (Khasi Social Custom of Lineage), Act, 1997, kaba pyrrkhing ban ai Scheduled Tribe Certificate sha ki briew kiba jied ban shim jait na u Kpa ne u Kurim.

Ka PIL, bala mudui da ka Syngkhong Rympei Thymmai, kala buh jingkylli halor ka jingweng noh dang shen ia kashithi bala pynmih da u Under Secretary ka Tnad Social Welfare ba 21 tarik Naitung 2020, kaba shah ia kiKhasi ba kin ioh ia ka Scheduled Tribe Certificate kam pher la ki shim ia ka Jait Kpa ne Jait u Kurim.

Ha ka shithi bala phah sha ki Deputy Commissioner ka East Khasi Hills bad West Khasi Hills District, la ong ba kane ka Ain kam shym la khang ban ai Scheduled Tribe Certificate “sha ki ba aplai kiba shim ia ka Jait la ka long na ka Kmie ne u Kpa bad ka jingbud ia ka Jait u Kurim da ka Kurim ka bym dei ka Khasi ruh la shah”.

Hynrei, ha ka 21 tarik Lber 2024, ka Tnad kala weng noh ia kane ka shithi, kaba lam sha ka jingsngewkhia ba ki bor khmih ki lah ban kyntait ban ai certificate ia ki Khasi kiba shim ia ka Jait Kpa ne Jait u Kurim.

Ka Iingkashari ba kynthup ia u Chief Justice IP Mukerji bad Justice W Diengdoh, kala bthah ia u Registrar General ban phah ia ka notice sha u Advocate General bad sha u nongmudui. Ka Iingkashari kala pan ruh ia ka jubab halor kane ka kam bad buh ia kane ka mukotduma ban shong bishar biang ha ka 7 tarik Nailar, 2025.

“Ngi hap ban shong bishar ia ki jingtynjuh ba markylliang. Ngim sngew satia ba ha kane ka khep ban pynwai noh ia kane ka PIL namar ba donkam iaki affidavit. Lada donkam ia ki affidavit ha ki sngi ban nang wan, ngi lah ban khot ia ki hynrei na ka bynta ka bha ka miat ka Jaidbynriew Khasi, kane ka kam ka dei kaba hap ban pynbeit noh kham kloi kat kaba lah” kala ong.