Shillong,Naitung 23 : U MLA ka Mawkynrew Bah Banteidor Lyngdoh, ula dawa ia u Myntri ka tnad Bording AT Mondal, ba un tuklar lem ha ka ban pyntreikam noh da ka skhim Revamped Distribution Sector Scheme (RDSS), ha ki 10 tylli ki shnong ka Mawkynrew Constituency khnang ba ki paidbah kin ioh ia ka bording kaba biang bad ba thikna ha ka thain.
Une u MLA ula aiti ruh da ka dorkhas ha u Myntri kaba batai ia ka jingdonkam ka thain Mawkynrew ia ka bording kaba thikna namar ka jingiai bteng ka jingbym ioh bording thikna bad ka jingot bording kaba neh da ki kynta.
Kat kum ka dorkhas, u Bah Banteidor ula pynpaw ba ki daw tynrai ka jingthut ka bording ka paw ba ka dei na ka jingsniew jongki transformer na ka por sha ka por ha ki shnong bapher bapher. U ong ba wat hadien bala bujli ia ki transformer, kiba thymmai ruh ki ju sniew noh tang khyndiat por, kaba lam sha ka jingeh hapdeng ki paidbah.
Ula ong ba kane ka jinglong jingman kala pynsyllang bha ia ka jingim ba man ka sngi jong ki paidbah khamtam ki khynnah skul, samla pule, ki briew bala noh rta bad ki dukan kiba donkam bha ia ka bording elektrik.
U Bah Banteidor ula kyntu ia u Myntri ban phah wad bniah ia ka jingbha, ka jinglah kit bad ka jingpyndait ia ki transformer bala wanrah ha ka thain nalor ban pynkhlain ia ki jingtei jong ka tnad sam bording ban pynthikna ia ka jingshngain ka rukom sam bording ha ka thain.
U Bah Banteidor ula kdew ba ki 10 tylli ki thain hapoh ka constituency ki dei kiba shah ktah jur eh bad namar kane, ula phah tuklar ban pyntreikam noh daka Revamped Distribution Sector Scheme (RDSS), kaba thmu ban pynjanai bad ka jingsam biang ia ka bor ding ha ki jaka sor bad jaka nongkyndong.
Ula pyntip ba kine ki thain ki kynthup ia ka Thangsning, Thynroit, Mawlyngot, Jongksha, Kharang, Jatah Lakdong, Nohron, Lynshing, Mawlat bad Laitkyrhong.
U MLA ula pynpaw ia ka jingkyrmen ba hapoh ka jingialam u Myntri, ka thain kan ioh iaka jingkyrshan ha ki kam kiba donkam kyrkieh.
, ha ki 10 tylli ki shnong ka Mawkynrew Constituency khnang ba ki paidbah kin ioh ia ka bording kaba biang bad ba thikna ha ka thain.){kind=link}