Guwahati, Nailur 08 : Ki kynhun seng lehnoh Adivasi ka Assam shen ki lah ban poi sha ka jingiateh soskular jingsuk bad ka sorkar pdeng.
Na ka liang u Myntri Rangbah (CM) ka Assam, u Himanta Biswa Sarma ula pyntip paidbah halor kane ka sienjam kaba lah ban wan urlong noh shen.U Sarma ula ong ba ka jylla ka lah ban sakhi ia kane jingiateh soskular jingsuk hapdeng ka sorkar pdeng bad ki seng lehnoh Adivasi hapoh une u bnai Nailur 2022.
Haba bynrap ia kane ka jingkren u Sarma ula ong ba ia kane ka jingiakren iasuk bad ki lehnoh Adivasi yn pynlong lyngba ki sienjam ba la shim da u Myntri kam pohiing ka sorkar pdeng u Amit Shah.
Katkum ki tyllong khubor, kine ki kynhun seng lehnoh Adivasi ki kynthup ia ka kynhun All Adivasi National Liberation Army, Adivasi Cobra Militant of Assam, Bisra Commando Force, Santhal Tiger Force bad ka Adivasi People’s Army.
Kane ka jingshim rai kala wan long ruh hadien ka jingmih lyngba ka jingpynjari ia ka jingsangeh iasiat kaba jlan hapdeng ki lehnoh Adivasi bad ka sorkar.Nalor kata kine ki kynhun seng lehnoh Adivasi mynta kila don shong la sah hapoh ki ktem shipor mynta lah kumba katto katne por.
Lah ban kdew ba ka sorkar pdeng kala iasoi ia ka jingiateh soskular ha ka snem 2020, ia kaba la tip kum ka ‘Bodo Peace Accord’ bad ka kynhun seng lehnoh National Democratic Front of Bodoland (NDFB).
Katkum ki tyllong khubor, ka sorkar pdeng kala shim ruh ia ka rai ban pyllait ia ka song jingiarap pisa na ka bynta ki nongshong shnong kiba dei ki Adivasi, ki Bodo bad ki Koch-Rajbongshis, ia kiba la ong ba kila shah pynkylla sakma namar ki jingiaumsnam kiba la jia ha ka jylla.
