Shillong, Nailur 07 : Ka President ka Ri India ka Droupadi Murmu ka lah ban wan iuhkjat mynta u bnai ha Jylla Meghalaya bad kiwei kiwei ki Jylla ka thain Shatei Lam Mihngi ka Ri.
Ia kane la pyntip da u Myntri Rangbah ka Jylla Conrad Kongkal Sangma hynne ka sngi Balang.
“Ngim pat ioh satia ia ka jingaiktien da ka jingthoh ia ka sngi ba kan wan. Nga la kyrpad ia ka ban wan sha Meghalaya. La pyntip sha ngi ba ka lah ban wan ha ka taiew ba ar jong u Nailur hynrei…Ngan kiar na kaba ong eiei namar kam dei hapoh ka bor jong nga hynrei hooid kala don ka jingiakren ba ka President kan sa wan sha ka thain Shatei Lam Mihngi” ula ong haba iakren bad ki nongthoh khubor.
U Conrad ula ong ba ka jingaiktien kaba la wan sha ka Jylla kala bthah ia ka Sorkar Jylla ban lum thup ia ki Project kiba lah ban plie da ka President.
“Ha kane ka thup, ngi la buh ia ka Crowborough Hotel hynrei ngi la ioh khubor ba ki kwah ban kiar na ki nongkynti shimet bad ki kwah tang ia ki project ka sorkar Jylla” ula ong.
Namar kane, ka jingtyrwa ban plie ia ka Crowborough Hotel ha ka 7 tarik Nailur, la hap ban pynjlan noh sha ka taiew ban wan, ong u Conrad haba kular ba ia kane ka project yn sap lie shuwa ban kut ka dorbar synrai jong ka Iingdorbar Thaw Ain ka Jylla.
