Shillong, Naitung 22: Phra ngut ki nong Bangladesh kiba la wan rung tuh, kila shah kem na New Bongaigaon Railway Station, ha ka sngi Ba-ar bad kila batai bniah ba kumno ki ioh rung sha India lyngba ka jylla Meghalaya bad ba kim shym la iohi satia ia ki bor pahara ha khappud ha ka por mynmiet.
Kine ki phra ngut ki nong Bangladesh kila rung tuh ha ka miet sngi Nyngkong bad kila shim kabu ruh ia kaei ba ki ong ba ym shym la don ki bor pahara ha khappud bad namar ka jingkhyllem noh ki jaka ba teh sainar shiah namar ka jingther u slap, kila ioh lad ban rung tuh sha u pud u sam jong ka ri India.
“Ngi wan na Bangladesh. Ka jaka ba ker sainar shiah kala khyllem namar ka jingther u slap ba jur bad ngi la kiew najrong jong ki jaka ker sainar ba la khyllem ban rung sha India. Kim shym la don satia ki bor pahara ha katei ka jaka bad ngi la ioh ban rung sha u pud u sam jong ka India,” ong u wei u nong Bangladesh.
Shuh shuh sa u wei u nong Bangladesh u la ong, “Ngi wan na Bangladesh bad ngi thmu ban leit sha Chennai ban leit trei bylla” haba bynrap ruh ba kane ka kynhun kila jam lyngba ka Jamalpur sha Meghalaya.
Kaba kham sngew shyrkhei ka long ba u wei na ki nongwan rung tuh na Bangladesh u la ong ba ki lah ban don shibun ki briew kiba la lah ban lait ban kam lyngba sha u pud u sam jong ka ri India.
